BANTAY, Ilocos Sur – Kinumpirmaran ti maysa nga opisial ti ahensia ti padanum ditoy probinsia a naan-anayton ti operasion ti Banaoang Pump Irrigation Project iti itatapog ti Hunio daytoy a tawen.

Daytoy ti impasingked ni Manny Lacson, hepe ti right of way ken public relations officer ti National Irrigation Administration bayat ti pannakatesting ti sumagmamano a makina ti BPIP itay nabiit.

Kiniddaw ti NIA Central Office ti pannakatesting ti tallo a makina ti BPIP manipud kadagiti pito a makina daytoy tapno masiguro a naannayas ti panagbombada sakbay a maiyawat ti pannakaimatonna iti NIA provincial office.

Iyawat ti kontraktor a China  Agricultural Machinery Import/Export and Import Company (CAMCI) ti proyekto a manamnama a mangsuplay iti padanum iti nadumaduma nga ili iti umuna a distrito ti probinsia a pakaibilangan ti Bantay, Vigan City, Caoayan, San Vicente, Sta. Catalina, San Ildefonso, Sto. Domingo, ken Magsingal.

Idi bimmisita ni  Pres. Gloria Macapagal Arroyo ditoy probinsia idi Enero 27 daytoy a tawen, imbilinna ti pannakaidaras a malpas daytoy proyekto ti padanum a narugian idi Marso 2003.

Kinuna ni Pres. Arroyo nga agbalin ti BPIP a rangtay tapno dumur-as ti agrikultura iti Ilocos Sur a karaman iti North Luzon Agribusiness Growth Quadrangle.

Ti proyekto ket addaan iti agarup 1.2 kms. a tunnel, 22 kms. a service main canal, 46 kms. a lateral canal, 170 kms. a drainage, 310 kms. a ditch ken 870 kms. a service roads.

No naan-anayen ti operasionna, umabot iti 6,312 nga ektaria a kataltalonan ti mapasayakanna a kataltalonan a manamnama a mangingato iti produksion ti pagay a pakabenepisiaran ti 5,334 a pamilia iti walo nga ili iti umuna a distrito ti Ilocos Sur.#