Footer

Public hearing ti tricycle fare rollback, naangay

VIGAN CITY – Kinuna ni Konsehal Everin Molina nga ikonsidera ti komite nga ipanguluanna saan laeng dagiti commuters no di pay dagiti operators ken agpaspasada iti traysikel mainaig iti petision a maibaba ti plete ti traysikel ditoy siudad.

Iti public hearing a naangay itay lawasna, kiniddaw dagiti commuters ti pannakaibaba ti plete ti traysikel iti P2 agsipud iti panagpababa ti presio dagiti produkto ti petroleo iti world market.

Maipalagip a naipangato iti P10 ti plete ti traysikel ditoy siudad gapu iti isusuyop ti presio ti lana ngem dakkelen ti bimmabaanna iti agdama.

Ngem singasing dagiti operators a P1 laeng ti bumabaan ti plete agsipud ta agtultuloy latta ti kinangina dagiti spare parts ti lugan.

Naisingasing pay nga status quo ti P10 a singir ti plete ti traysikel idinto a maibaba ti plete dagiti estudiante iti P6.

Maysa a sensitibo nga isyo ti plete ti traysikel ditoy siudad agsipud iti kadakkel ti grupo dagiti traysikelan a mabalin a pakatinnagan wenno pakaitag-ayan ti maysa a politiko iti panawen ti panagpipili.

Kinuna ni Molina nga idatagto ti komitena ti rekomendasionna kas maibatay dagiti timpuar iti public hearing tapno trataren ti konseho iti sumaruno a session.#