Pugot ti nanglugan kadagiti 5 estudiante?

CABUGAO, Ilocos Sur – Pugot ti nanglugan kadagiti lima nga estudiante a babbai iti maysa pagadalan-sekundaria ditoy gapu iti pannakakibor ti paggigiananda a bubon?

Pudno man daytoy wenno saan, adu kadagiti nagannak ken estudiante ti sineknan iti amak gapu iti pannakaluglugan iti lima nga estudiante ti Pug-os National High School ditoy nga ili a mapapati a nangrugi pay la idi Pebrero daytoy a tawen.

Adda payen dagiti sumagmamano a nagannak a didan pinalubosan dagiti annakda a mapan iti pagadalan gapu iti amakda a mairamanda a maluganan iti mapapati a pugot a “nabuak” iti pagtaenganna a bubon gapu iti nagbalin daytoy a pagibasuraan iti rugit.

Mapapati a no maluganan dagiti nasao a babbai, agbaliw ti tignay ken bosesda, agbalinda nga arogante ken agkissiwda.

Segun iti maysa a nataengan, mamati a pugot ti nanglugan iti maysa kadagiti babbai ta ingget pigsa daytoy no agkissiw ket uray limada, adu a rigatda a mangtengngel kenkuana.

Kanaig daytoy, nagpamisa dagiti mangisursuro ti pagadalan sada pinakaluban  ken inikkan iti krus ti rabaw ti bubon tapno pumanaw dagiti dakes nga espiritu, no adda man.

Adda met siguro nagnaanna ta simmardeng ti panagkissiw dagiti nadakamat nga estudiante.#