Pulong kontra aglabsing a traysikelan, maaksionan

VIGAN CITY – Saan nga agguddeng dagiti traffic enforcers a mangipakat iti aksion kontra kadagiti traysikelan nga agsalungasing iti paglintegan ti siudad nangruna iti panagsingir iti nalablabes a plete, daytoy ti imballaag ti pangulo ti Vigan City Public Safety and Management Office.

Indagadag ni SPO4 Fernando Quebral kadagiti commuters ditoy siudad iti panangipulongda kadagiti tricycle drivers nga agsingir iti sobra a plete tapno maaksionan ti opisinada.

“…ipakatmi ti city ordinance agsipud ta dimi kayat nga umadu ti kastoy ti galadna nga agpaspasada iti traysikel ditoy Siudad ti Vigan,” kinuna ni Quebral.

Inggunamgunam ni Quebral kadagiti commuters ti panagluganda kadagiti traysikel nga adda prangkisana wenno adda body number iti tuktok ti traysikel tapno nalakada a matuntonan dagitoy no agsingirda iti nalablabes wenno adda mabatbatida iti traysikel a paglugananda.#