Pulso ti eBook iti Literatura (Tuloyna)

Ni  Jaime M. Agpalo, Jr.

 

Kasano met ti e-book publishing iti lubong ti literatura? Dagiti dandaniw, sarita, nobela, drama ken dadduma pay?

Makuna a sumingsingising daytoy no kadagiti kangrunaan a lengguahe ken ti global English. Ngem ditoy pagiliantayo, saan pay a naglabanag ti leleggakan ti ebook publishing nupay makuna a dakkel ti potensialna nga income generating gapu ta adun dagiti advertisers nga agsapsapul kadagiti kabaruanan a kapanunotan tapno maiyam-ammo a nasayaat ken nasaknap ti negosioda wenno aniaman a motibo ti advertising.

Ngem adda makitatayo a lapped iti biang ti literatura. Sumagmamano ti rason, kangrunaan ditan ti limitado a readership no agsuratka iti Tagalog. Nakarkaro pay dagiti regional languages ken dialects, ibagada a limitado ti readership; isu a dagiti dadduma, simrekda iti global language nga English tapno saan a limitado ti readership. Nalawlawa ti market ditoy.

Ken ni Ilokano, nakarkaro pay nga ad-adayo ti leleggakan ti ebook publishing. Saan laeng a dagiti nadakamat a rason iti ngato ti makagapu. Mainayon ditoy ti bilang dagiti makaakses iti internet. Amin a makaakses iti internet ket posible nga ibilang a kostumer; ngem, kas  gagangay a mapaspasamak,  saan amin a makaakses iti internet ket gumatang iti tagilako. Ngarud nalidem pay ti ebook publishing ken ni Ilokano. Nupay adda dagiti sumagmamano a simrek itoy ngem para iti libre a basaen, saan a para  lako.

Matumal iti panaglakuan dagiti ebook a Tagalog ken gapuanan dagiti bangolan ken mararaem a mannurat. Lalo ket self publishing pay ti kaaduan. Ti pagdumaanna iti self publishing, nakapsut ti malakuan uray ngata usaren dagiti networking sites ken dagiti blogs a libre a behikulo ti advertising. Masapul latta ti nakananama a direct marketing techniques, promotional ken sales campaign techniques. No self publishing kasapulan ti naregget a publisidad.

Kasapulan ngarud dagiti publisher wenno dagiti adda iti publishing business. Iti imasna, awan pay laeng ti gunay dagiti publisher iti ebook publishing iti pagilian.

Pinnaliiw. Kas iti dati, awan ti publisher a makisugal iti daytoy a negosio no saan a sigurado nga agsubli ti puonanna. Awan ti negosiante a mangibaut iti puonanna iti aniaman a gannuat wenno proyekto a dina namnamaen a kumita. La ketdi!

Iti self publishing ti ultimo a rekursos ni mannurat a tumapog iti ebook publishing. Adda ketdi naraniag nga init iti self publishing no napintas la ketdi ti partuat wenno aramid. Kas pagarigan laengen ken ni Darcie Chan a saan a nagballigi a nangpatung-ed kadagiti ginasut a publisher ken agents a nangipakitaanna iti nobelana. Simrek iti ebook self publishing ket, presto, nakalakon iti dandani kagudua a million a kopia ti nobelana!

Ngem, nagenned pay ti ebook publishing ditoy pagilian babaen kadagiti nadumaduma a lengguahe ken dialekto ket aguraytayo pay iti sumagmamano a tawen ngata sakbay a sumingising ti init. Karamanen ditoy ni Ilokano.#