Footer

Pundo dagiti ospital para indigent patients, dua a tawen a di inted ti PCSO

VIGAN CITY – Iti napalabas a dua a tawen, awan ti endowment fund a naaw-awat dagiti public hospitals iti probinsia.

Kinuna ni Bise Gobernador Jeremias “Jerry” Singson a naammuanna laengen ken ni Philippine Charity Sweepstakes Office chairman Valencia a saan a naited ti endowment fund dagiti ospital iti probinsia iti napalabas a dua a tawen gapu ta saan gayam nga inaprobaran ti Commission on Audit a dagiti hepe iti ospital ti makipinnirma iti katulagan ti nasao a pundo iti PCSO no di ti gobernador.

Ti endowment fund ti paggapuan iti gasgastuen dagiti district hospitals iti probinsia a pakairamanan ti Gabriela Silang General Hospital para iti libre a serbisio kadagiti indigent a pasiente.

Agdagup iti P3 milion ti nasao a pundo manipud iti PCSO.

Kinuna ti bise gobernador a masdaawan ta iti napalabas a manon a tawen, dagiti chief of hospitals ti nakipinpinnirma iti PCSO mainaig iti endowment fund ket saan laeng a ditoy probinsia no di iti amin a probinsia iti pagilian ti pakapaspasamakanna ngem ita laeng nga adda kasta a pagannurotan ti COA.

“Uray no kasta, surotenmi ti kayat ti COA,” kinuna ni Singson idinto nga innayonna a maysa a resolusion ti ipasa ti sangguniang panlalawigan a mangited iti otorisasion ken ni Gov. Savellano a makipinnirma iti PCSO.

“Dagiti walo a chiefs of hospitals, mabalindan ti makipinnirma ta addan authority ni apo gobernador a makipinnirma iti PCSO ket maited met laengen ti endowment fund dagiti nadumaduma nga ospital para kadagiti indigent (a pasiente),” kinuna ni Singson.

Manamnama a sumangpet ti nasao a pundo iti daytoy met la a tawen.#