Puntiria a koleksion ti buis, narimbawan

CABUGAO, Ilocos Sur – Narimbawan manen ti business licensing office ti puntiriana ita a tawen a kolektaen a buis manipud kadagiti nadumaduma a pasdek-negosio ditoy nga ili.

Naammuan ti Tawid News a nakakolekta ti nasao nga opisina iti agarup P4 milion manipud iti mayor’s permit, business tax ken dadduma pay a fees iti panaglisensia, ad-adu nga amang ngem ti P2.6 million a puntiriada a makolekta iti daytoy a tawen.

Kanaig daytoy, kinuna ni Municipal License Inspector Racquel Ancheta a deadline idi Enero 20 ti panagbayad iti business tax. Kalpasan daytoy a petsa, addan maipataw a 25% penalty iti pakabuklan ti mabayadan a buis iti negosio.

Kinuna ni Ancheta a sumagmamanon a tawen a marimrimbawan ti opisinana ti projected a tax collection manipud iti negosio.#