Pupil, dinungpar ti kotse, natay

STA. CRUZ, Ilocos Sur – Maysa nga elementary pupil ti natay gapu iti panangdungpar kenkuana ti maysa a kotse bayat ti ibaballasiwna iti national highway iti barangay Casilagan, ditoy.

Natay on the spot ti biktima a nabigbig a  Maria Isabel Francia, 9, ken agbasbasa iti Casilagan Elementary School gapu iti grabe a sugatna iti panangdungpar kenkuana ti Nissan Sentra a minaneho ni Aldwin Ambal y Macalintal, 35, naasawaan, project manager iti International Family Food Service iti Jerusalem St., Marikina City.

Segun ti imbestigasion ti polis ditoy, agtartaray ti biktima nga agpaabagatan idi bigla a bimmallasiw iti kalsada, nagpreno ni Ambal ngem nadungparna latta ti ubing ket naipuruak daytoy iti sangapulo a metros iti kaadayona.

Natayen ti ubing idi dumsaag ti drayber tapno itarayna iti ospital.