Footer

PVAO kadagiti pensionado: agannad kadagiti fixers

VIGAN CITY – Indagadag ti mangidadaulo iti Philippine Veterans Affairs Office (PVAO) ti saan a panagtalek  dagiti beterano kadagiti fixers a mangidiaya iti serbisioda tapno nadardaras ti pannakaawatda kadagiti pensionda.

Imballaag ni Vicky Antiporda, Officer In-charge ti PVAO, Vigan Field Office, nga adu dagiti fixers a mangus-usar iti opisinada tapno makadilihensia dagitoy iti kuarta manipud kadagiti beterano.

Kanaig daytoy, impakaammo ni Antiporda ti madama a panangisayangkat ti opisinada iti pensioners revalidation program para kadagiti pensionado a beterano kas paset ti kabarbaro a pagannurotan ti opisinada nga  automated teller machine (ATM) cards ti pangiruarton dagiti beterano kadagiti pensionda kadagiti naakreditaran a bangko kas iti Land Bank ken UCPB.

Kinuna ni Antiporda a narugian ti revalidation idi Agosto daytoy a tawen babaen ti notice a naipatulod kadagiti pensionado a beterano ngem nasurok pay laeng a sangagasut a beterano ti napan nagaplikar iti opisinada.

Segun iti officer in charge, adda nasurok dua ribu a beterano iti probinsia. Maikkan laeng dagitoy iti tallo a bulan a pawayway nga agaplikar iti revalidation.

Indagadag ni Antiporda ti saan a pangitantan dagiti beterano iti panagaplikarda iti rebalidasion tapno  saandanto nga agproblema iti pannakasuspende ti aw-awatenda a pension.

Agaw-awat ti maysa a beterano iti P5,000 a pension iti makabulan, kasta met iti surviving wife, idinto a P1,000 iti anak wenno benificiary.   

Kinuna ni Antiporda nga urayen ti beterano ti makabulan sakbay a  maruk-atan ti tsekena  babaen ti koreo ngem babaen ti ATM card, mabalindan nga iruar ti pensionda apaman a maruk-atan daytoy.

Innayon ni Antiporda a renewable dagiti ATM cards iti tunggal innem a bulan.

Dagiti kasapulan iti panagaplikar iti revalidation: notice a naawat, ATM remittance application form iti Land Bank wenno UCPB,  xerox ti naudi a naawat a tseke, barangay clearance, 2×2 ID picture , valid ID ken 3R picture a nakaiggem ti aplikante iti kopia ti kaudian a pagiwarnak.

Awan ti aniaman a bayadan dagiti beterano iti opisina ti PVAO, kinuna ni Antiporda.#