Footer

RA 9439: saan a mangted iti solbar iti parikut iti salun at

MAYSA manen a linteg ti pinirmaan ni Presidente Gloria Arroyo itay nabiit a saan met a makaited iti solbar iti parikut iti sasaaden ti salun-at no di ketdi mangparnuay iti dakkel a dalluyon a mangipaay iti ad-adda pay a kibor ken lilibeg iti daytoy a sektor.

Ibilbilin ti RA 9439 kadagiti ospital a pagawidenda ti asinoman a nalainganen a pasiente uray saan a makabayad. Asinoman nga aglabsing ket mabalud agingga iti innem a bulan ken agmulta agingga iti P50,000.00. Mapalubosan ti pasiente nga agawid babaen ti panangaramidna iti kasuratan a bayadanna ti nagastosna iti panagpaagasna iti ospital.

Ngem nagreklamo ti Philippine Hospital Association of the Philippines iti posible a pannakaabuso ti linteg. Ngamin, maab-abuson dayta a promise to pay note kadagiti pribado nga ospital. Segun iti nasao a gunglo, maysa laeng kadagiti sangapulo a pasiente a nangisubmitar iti kasuratan a bayadanna ti utangna ti nagsubli iti ospital tapno  agbayad.

Malugi dagiti ospital iti kastoy a situasion. Ad-adda nga umadu dagiti doktor a mapan agtrabaho iti ballasiw-taaw ta bumasbassit ti kitada.

No amirisen, protektaran ti RA 9439 dagiti pasiente a di makabayad idinto a saanna nga ikkan iti wagas ken bang-ar manipud iti pannakalugi dagiti ospital ken doktor. Maysa a bangking a timbangan a saan a mangipaay iti makapnek a solbar iti parikut no di ket kibor ken lilibeg iti poder ti salun-at.

Napasamak koma ti nasaknap a konsultasion kadagiti amin a maseknan sakbay a naaprobaran ti linteg. Naaramid koma ti nainget ken naannad a panagadal kadagiti amin nga ibungana ket maisapulan iti sungbat dagiti tumaud a panagduadua no di man panagkedked iti nasao a linteg.

Iti daytoy a linteg, ad-adda pay a maipit dagiti umili, lalo dagiti pasiente iti panagrinnisiris kadagiti kalintegan ken arungaing ti PHAP ken gobierno. Ti laeng pasiente nga immimbag a di palubosan ti ospital gapu ta saan a makabayad ti nakita ti gobierno ngem saanna a nakita ti sasaaden dagiti doktor ken ospital ken dagiti sumaruno a pasiente.

Nupay adda dagiti pagannurotan iti RA 9439 a maiyaplikar laeng kadagiti charity patients a saan ket a dagiti pasiente iti pribado a siled, saan met a narikna ti PHAP ti kinatalged daytoy ta posible a ni Donia Delilah ket ibagana nga isu ni Ikka Agpalpalama ken isuratna nga agtaeng iti dumpsite wenno iti no ania la ditan a sirok ti overpass wenno waiting shed.

Gapu iti rason nga iti maysa laeng kadagiti sangapulo a pasiente a nangaramid iti kasuratan ti nagsubli iti ospital  tapno bayadanna ti utangna  no apay a nangato la unay ti singiren dagiti ospital. Ngamin, subboten met ti ospital ti gastosna kadagiti pasiente a di nagbayad kadagiti pasientena iti agdama. Isu a nangina unay ti singirda.

Daytoy koma ti punto a naikkan iti preperensia iti panagamiris idi sakbay a dimteng ken nagraira ti “hospital detention” dagiti di makabayad a pasiente.

Tallo laeng ti maseknan iti daytoy: gobierno, pasiente, pribado (sektor) nga ospital.

Iti panangiparit ti RA 9439 iti “hospital detention,” kasla metten inyawat wenno impasa, no di man impilit ti gobierno ti reponsibilidadna a panangsaluad iti salun-at dagiti umili iti pribado a sektor.

Iti RA 9439, kasla nahold-ap lalo dagiti pribado nga ospital nga addaan iti kumpleto a ramit ken kagamitan. Kasla impakumiten ti gobierno iti pribado a sektor ti akemna a panangsaluad iti salun-at dagiti umili.

Ania kadi ti rumbeng koma a napasamak? Naadal koma met ti biang dagiti ospital lalo ti PHAP.

Yantangay ti gobierno ti rumbeng a mangsaluad iti salun-at dagiti umilina, rumbeng laeng a mangilatang iti pundo a pangsulnit kadagiti utang dagiti saan a makabayad a pasiente. Ginasut a million a pisos ti maited a pork barrel dagiti senador ken diputado ngem awan man laeng ti maited a budget para kadagiti umili a saan a makabayad iti ospital. Ken  mailaksid koma ti pundo a mapataud kadagiti nalaing nga ag-divert kadagiti pundo. Ngamin ditoy pagilian, mapaspasamak ti pananggastos iti maysa a pundo para iti sabali a proyekto.

Maamienda koma dagiti pagannurotan ken allagaden dagiti ahensia ken katulongan nga ahensia ti gobierno a tumultulong maipapan iti salun-at kas iti SSS, GSIS, Philhealth, Philippine Charity Sweepstakes, Pagcor, Pag-ibig Fund ken dadduma pay a saan ketdi nga agserbida a pagbagasan iti saan a nalawag a proyekto ken programa.

Iti pannakaiyimplimentar ti RA  9439, dumakkel la ketdi ti bilang dagiti saan a makabayad iti pribado man wennoiti ospital ti gobierno. Ngem no usigen a nalaing ti RA 9439, ad-adda a mabukolan ditoy dagiti ospital ti gobierno. Iti daydiay maysa kadagiti sangapulo pasiente a saan a makabayad iti pribado a ospital, posible a dakdakkel nga amang iti biang ti ospital ti gobierno. A lalo met a pakalugian dagiti ospital ti gobierno.

No saan a masabat dagiti patauden daytoy a linteg, tumaud la ketdi ti krisis iti sektor ti salun-at: adu ti agserra nga ospital, agpanaw dagiti doktor, wenno posible nga agtriple no di man dakdakkel pay a porsiento ti bayadan ta subboten dagiti ospital ti gastosda kadagiti pasiente a di nagbayad kadagiti sumaruno a pasienteda.

Liklikan koma ti gobierno ti panangipasana babaen ti linteg iti responsibilidadna iti pribado a sektor…#