Footer

Radiator shop, natakawan

CANDON CITY –  Natakawan ti maysa a radiator shop a kukua ti maysa a residente iti Vigan City idiay Barangay Bagani Campo ditoy itay nabiit.

Nagreport ni Manuel Natividad, 44, residente iti Barangay Beddeng Daya, Vigan City, Ilocos Sur, akinkukua  iti Noli’s Radiator and Air Con Shop, a natakaw dagiti ramramit iti shopna nga aggatad iti aganay P200,000.

Segun ken ni Natividad, awan ti nagbantay iti shop gapu ta makalawas a nagsakit ti mekanikona.

Idi manglukatda, naduktalanda nga awanen ti 5 a radiator, socket wrench, vice grips, water power sprayer, aircon compressor, acetylene set, ref compressor, buffing tool ken dadduma pay a ramit nga agpateg iti mapattapatta a P200,000.

Kinuna ni Natividad a dinadael dagiti di pay nabigbig a mannanakaw ti ruangan a natakkaban iti plywood ken nakandaduan.#