Radiology Center naluktan iti Gabriela Silang Hospital

By Mancielito S. Tacadena

VIGAN CITY – Nailukat ti kabarbaro a radiology center iti Gabriela Silang General Hospital idi Abril 27 kas paset ti programana a mangipaay iti  nasaysayaat a serbisio ti salun-at kadagiti agindeg iti probinsia.

Kinuna ni Rema Padilla-Ohno, chief executive officer ti HIMEx, nagbinnuligan ti gobierno probinsial ken ti High Integrated Medical Engineering Exponent (HIMEx), maysa a pribado a kompania, daytoy a proyekto a mangipaay kadagiti equipment nga aggatad iti aganay P100 milion.

Karaman kadagiti moderno a ramit nga adda itan iti nadakamat a balay pagagasan ti Magnetic Resonance Imaging (MRI), General Ultrasound, Conventional X-ray system ken CT-scan (multi slice).

Kinuna ni Padilla-Ohno nga ipaayda dagiti dekalidad a serbisio iti nababbaba a presio  maikumpara iti singsingiren dagiti adda iti pribado a balay-pagagasan.

Segun ken ni Padilla-Ohno, no agdalan ti pasiente iti MRI, P6,000 laeng ti singiren ti HIMEx idinto a P14,000.00-16,000.00 ti singsingiren dagiti private hospitals.

Kinuna ni Padilla-Ohno nga awatenda met babaen ti pannakikoordinar dagiti pasiente iti GSGH, dagiti addaan iti Philhealth cards ken uray pay dagiti pasiente nga esponsoran dagiti LGUs ,  basta maipakitada la ketdi dagiti kasapulan a dokumento.

Dinawat ni Ohno ti suporta ti amin tapno agtuloy ti panagballigi ti proyekto idinto nga innayonna nga addaan iti 7-15 a tawen a kaatiddog ti proyekto ket no dumaan wenno agbalin nga obsolete dagiti ramit, dagus a sukatanda iti kabaruanan tapno masigurado ti de-kalidad a serbisio a maipaayda kadagiti agkasapulan.

Kanaig daytoy, dinawat ni Gov. Luis “Chavit” Singson ti  naimpusuan a serbisio dagiti agtrabtrabaho iti GSGH kangrunaanna dagiti doktor.

“Ipaaytayo koma ti pudno a serbisio kadagiti pasiente ken saantayo a gundawayan ida. Agyamantayo iti HIMex ta immayda impaay dagiti pagkurangantayo a ramit nga awan a pulos ti kuarta nga inruar ti probinsia,” kinuna ti gobernador.

Nupay saan a libre ti serbisio, mamati ni Singson nga adu ti maallukoy a mapan iti GSGH gapu ta amang a nalaklaka ti bayad ti serbisio, kasta pay a libre a makapagsanay dagiti student-nurses babaen ti aktual a panangusarda kadagiti nadakamat a ramit.

Kabayatanna, kalpasan ti naangay a forum idi Abril 26, sumaruno a maaddaan ti GSGH iti dialysis center babaen ti K.E.B. Company a mangipaay kadagiti kasapulan a makinaria para kadagiti pasiente nga agdalan iti dialysis.

Kas iti HIMEx, ipaay ti K.E.B. ti serbisioda iti nalaklaka a presio.

Binisitan dagiti pannakabagi ti K.E.B. ti paset ti ospital a posible a pakaipuestuan dagiti ramit ket apaman a masimpa daytoy, mangrugin ti serbisio ditoy iti las-ud ti  tallo a bulan .

Kinuna ni Emmanuel Penzon, makinkukua iti nadakamat a kompania, a  maikkan pay ti pasiente iti libre a seminar no kasano nga aywananna ti bagina bayat ti panagdalanna iti dialysis tapno nadardaras ti pannakapasublina iti pigsana idinto nga impalgakna a  taga-Ilocos Sur ti pagsanayenda a mangpagaraw iti nasao a ramit.#