Ramit-talon, serbisio, nagtudo iti Kapitol Outreach Program

STA. MARIA, Ilocos Sur – Gapu iti aglaplapusanan nga “ayat” nga intedda iti goberna-dor idi eleksion idi Mayo 2012, nagtudo ti grasia iti Barangay Lesseb iti pannakaisayangkat ti Kapitol Outreach Program a na-angay iti Ilocos Sur Polytechnic State College Gym ditoy nga ili idi Septiembre 20, 2013.

Impakaammo ni Gov. Luis Ryan Singson nga inted amin ti gobierno probinsial dagiti kiniddaw dagiti barangay officials ti Barangay Lesseb kas panagsubalitna iti pannakaibbong ti kinasangona iti kinagobernador iti probinsia iti napalabas nga eleksion.

Daytoy ti kaunaan a KAPITOL Outreach Program a naangay iti babaen ti administrasion ti Gov. Ryan Luis Singson.

Malaksid kadagiti ramit-talon, naikkan pay ti Barangay Lesseb iti multicab.

Naragsak amin dagiti barangay officials agsipud ta naited dagiti kiniddawda iti gobierno probinsial a pakairamanan dagiti traktor, kuliglig, corn sheller, shredder, generators, water pumps seed bags ken hose;  tali, iket ket dadduma pay a mausar iti panagaramid iti payao; kitchen utensils, mobile sound system, megaphones, tugtugaw ken lamisaan, wheelchairs ken sarukod para kadagiti nataengan a saanen a makapagna.

Kagiddan ti pannakaiwaras dagiti ramit, naipaay pay kadagiti agindeg ti libre a medical ken dental a serbisio a nakaiwarasan pay ti libre a bitamina ken agas kalpasan ti konsultasion. Naipaayan met iti seminar dagiti agtrabtrabaho iti barangay kangrunaanna ti benneg ti linak ken talna ken iti panagsagana iti idadateng ti kalamidad.

Segun ken ni Singson, itultuloyna daytoy a programa ti amana a ni sigud a gobernador Chavit Singson gapu ta nakitana a daytoy ti addaan kadakkelan nga impact kadagiti tattao.

Kinuna pay ti gobernador a ti Sta. Maria ti immuna a nakaangayan daytoy a programa gapu ta nakaro a naapektaran daytoy iti napalabas ng iduduprak ti bagyo gapu iti pannakalayus ti kaaduan a barangay ditoy. (Karaman ti report ni Mancielito S. Tacadena)