Rebbengna a mawayawayaanen dagiti agtawen iti 70 a balud

ITI ISASANGBAY ti Paskua, ibilang la ketdi  dagiti  balud nga agtawenen iti 70 agpangato a kapintasan a sagut ti panangtungpal ni Pres. Arroyo iti kiddaw ti simbaan a maipaayan ida iti pardon gapu iti edadda ken kas kuna ti simbaan, gapu ta ad-adda a rumbeng a maruk-atandan ngem dagiti sumagmamano a nakonbiktaran a kas kada napadisi a Presidente Joseph Estrada, ni Pablo Martinez ken ni dati a Diputado Romeo Jalosjos.

Madakamat ditoy a naikkan da Estrada iti presidential pardon kalpasan ti pannakakonbiktarna iti plunder iti baet ti isusupring dagiti civil society groups ken ti oposision. Napigsa met ti isusupring dagiti tattao iti pannakawayawaya ni Martinez, maysa kadagiti nakonbiktar iti pannakapapatay ni dati a Senador Benigno “Ninoy” Aquino.

Itay nabiit, maruk-atan koma metten ni dati a Dip. Romeo, nakonbiktaran iti panagrames iti maysa nga agtawen iti 11 a babai, ket adda payen pammilin manipud iti New Bilibid Prisons (NBP) no saan a sinabat dagiti pammabalaw manipud kadagiti maseknan nga umili.

Kapaliiwan a napigsa ti isusupiat iti pannakaited ti executive clemency kada Estrada, Martinez ken iti naibabawi a pannakaruk-at ni Jalosjos gapu iti dida panangannugot iti basolda nupay nadagsen dagiti pammaneknek a nagbatayan ti korte a nangkonbiktar kadakuada ken kaawan panangipakatda iti panagbabawi iti kaso a nakakonbiktaranda.

Sumurotkami iti kapanunotan ti Simbaan a rebbengna a maruk-atanen dagitoy a balud gapu iti “humanitarian reasons” gapu iti pannakagtengda iti maika-70 a tawenda. Nupay kasta, kasapulan met a masukain a naimbag no talaga a nagbalbaliw ken nagrepormadan, ken inannugotda ti nagbasolanda tapno iti pannakaruk-atda, surotenda ti nalinteg a pannakipagili, saan ket nga agbalinda latta a padagsen ken makaited iti pagpeggadan iti gimong.

Mamatikami met nga iti pannakaipakat ti sentensia iti maysa a tao gapu iti panagsalungasingna iti linteg, maipupok iti pagbaludan saan a tapno ikarona ti nagbasolanna no di tapno agdalan iti gundaway nga agreporma ken mangbalbaliw iti biagna tapno iti iruruarna iti pagbaludan, agbalin a pagwadan nga umili ken kas kameng ti paggargarawanna a gimong.

Ngarud, iti panangipaay ni Pres. Arroyo iti executive clemency ni Estrada ken Martinez, rebbengna laeng a pinaragsakna itay a  Paskua dagiti balud nga agtawenen iti 70 agpangato babaen ti iruruarda iti pagbaludan.

Kunada: Ayat ti isangbay ti Paskua, rebbengna laeng ti panangisangbay ni Pres. Arroyo iti ayat kadagitoy nabayagen nga agsagsagaba a balud a mangrugin a mangtallikud iti malem iti biagda.#