Footer

Recruiter, inreklamo dagiti biktimana

STA. LUCIA, Ilocos Sur.  Maysa a mapapati nga illegal recruiter ditoy ti inreklamo dagiti biktimana gapu ta dina natungpal ti inkarina nga aldaw a panagluasda a mapan agtrabaho iti ballasiw-taaw.

Inreklamo dagiti biktima a pakairamanan da Ma. Cristina Gadiano, 34, ken Neil Gadia, 24, agpada a residente iti barangay Parioc 1st, Candon City;  Alex Hachiles, 35,  residente iti Bayugao, Santa Cruz; Rosalia Sarmiento, 26; Rolando Escanio, 31;  ken Juanito Escanio Jr., 33, agpapada a residente iti Sabuanan, ditoy ni Heidinora Guiang, maaw-awagan pay iti Rogelio Guiang, agnaed iti Laoag City, gapu ta saanna a natungpal ti karina nga agbiaheda iti naituding nga aldaw.

Iti reklamoda iti polis, kinuna dagiti biktima a nagbayadda ken ni Guiang para iti pannakaproseso dagiti papelesda idi March 19, iti daytoy a tawen idiay Sabuanan ditoy para iti panagtrabahoda idiay Spain.

Mapapati nga impatalged ti suspetsa a  makatayab dagiti biktima sakbay nga agtapos ti bulan ti Mayo.

Gapu ta saanda a nakatayab iti petsa nga intuding ti suspetsa, inkeddeng dagiti biktima ti panangireklamoda iti daytoy iti polis. 

Agtultuloy ti inbestigasion ti polis mainaig iti nasao a reklamo.