Regional Outstanding Barangay Nutrition Scholar, pinadayawan ti sangguniang panlungsod

VIGAN CITY – Pinadayawan ti sangguniang panlungsod ditoy ti barangay nutrition scholar a napili a Most Outstanding Barangay Nutrition Scholar in Region 1 itay nabiit.

Inyawat ti sangguniang panlungsod ti maysa a resolusion a pinutar ni Councilor Kristen Benedict Figuerres ken ni BNS Anaryll Adriatico bayat ti session ditoy kas panangpadayaw kenkuana gapu iti pannakapilina a Regional Outstanding Barangay Nutrition Scholar para iti 2015.

Pinili ti evaluation team ti National Nutrition Council ni Adriatico nga awardee kas Regional OBNS gapu kadagiti nagapuananna a nangital-o iti programa ti nutrition iti Barangay Ayusan Norte a pagpapaayanna a kas BNS.

Kas awardee iti regional level, ibagian ni Adriatico ti Region 1 iti pasalip a pakapilian iti National Outstanding Barangay Nutrition Scholar iti seremonia a maangay iti Metro Manila iti daytoy masungad a Disiembre. (Karaman ti report ni Edison Raboy)