Rehabilitasion ti kalsada ti Tamurong, nakiddaw

STA. CATALINA, Ilocos Sur – Naikiddaw ken ni Gov. Ryan Singson ti panangilatangna iti pondo para iti rehabilitasion ti kangrunaan a kalsada ti Barangay Tamurong ditoy nga ili.

Sakbayna, inaprobaran ti Konseho Munisipal ditoy nga ili ti resolusion a pinutar ni Konsehal Niño Realin a nakaipalaonan ti kiddaw iti gobernador a mapunduan ti farm to market road ti nadakamat a barangay.

Kiniddaw ti nasao a resolusion ti P3 milion manipud iti gobierno probinsial babaen ken ni Gov. Singson para iti nasao a proyekto.

Immun-una ngem daytoy, kiniddaw pay ti nasao a konseho ti pundo a P10 million para iti seawall.

Mismo nga inyawat dagiti konsehal dagiti dua a resolusion ken ni Gov. Singson.#