Relief goods inwaras ti gobierno munisipal ti Narvacan

NARVACAN, Ilocos Sur –  Nasurok dua ribu a bumarangay ti nawarasan kadagiti relief goods idi Hulio 26 kas tulong ti gobierno munisipal ditoy kadakuada gapu iti naglabas a napaut a dakes a tiempo.

Mismo a da Mayor Zuriel Zaragoza ken dagiti kameng ti sangguniang bayan nga indauluan ni  Bise Mayor Charito Zaragoza ti nagibunong kadagiti relief goods a sinaksian dagiti opisial dagiti nadumaduma a barangay ditoy nga ili.

Kinuna ni Zaragoza a nagibunongda kadagiti relief goods kas tulongda kadagiti kailianda a naapektaran iti nasurok makalawas a panagtudtudona.

“Dandani maysa a lawas a nagtudo, ket adu kadakuada ti di nakatrabaho unay,”  kinuna ni Zaragoza.

Kinuna ni Zaragoza a nagtitinnulonganda nga opisial ti Narvacan ti pannakapaadda dagiti relief goods agsipud ta dida met makairuar iti pondo manipud iti calamity fund gapu ta saan a naideklara nga under state of calamity ti probinsia.

Daytoyen ti maikadua a gundaway a nangted ti gobierno munisipal iti tulong kadagiti agindeg ditoy ket aganay 4,000  a relief goods ti inwarasda.

Kinuna ti mayor nga adda pay libre nga agas nga ipapaayda kadagiti kakailianda.

Kabayatanna, impalgak ni Zaragoza a pirma laengen manipud iti Department of Interior and Local Government ti kurangna tapno pormal nga agtugaw ni Barangay Captain Loreto Caballes a presidente iti Liga ng mga Barangay Captains.

Ni Caballes ti maisukat ken ni Barangay Captain Reynaldo Canto kas ABC president gapu ta addan daytoy iti Amerika.

Ni Caballes ti bise presidente ti liga dagiti barangay captains.

Timmabunon ni Caballes iti session ti sangguniang bayan ditoy. (Danny Antalan)