Relief goods naipan iti Sugpon babaen iti helicopter

VIGAN CITY – Gapu ta saan a makapagna dagiti lugan nga agturong iti ili ti Sugpon, bimmulod ti gobierno probinsial iti helicopter a pangidanon kadagiti relief goods para kadagiti nadidigra a residente iti nasao nga upland municipality.

Kinuna ni Gov. Singson nga impasublat ni Sen. Cynthia Villar ti helicopter nga inaramatda a pangidanon iti tulong kadagiti agnaed iti Sugpon agsipud ta nagbalin nga isolated daytoy nga ili gapu iti landslide ken panagdinakkel iti karayan.

Innayon ni Singson a karaman ti medical team iti bunggoy a naglugan iti dua a helicopter tapno maipaayan iti serbisio iti salun-at dagiti agnaed.

Naammuan ken ni Singson nga adu nga ubbing iti Sugpon ti naireport nga agsasakit gapu iti pannakadidigrada ken ni Bagyo Mario.

Sakbayna, napan dagiti truck ti gobierno probinsial iti Suyo, Sigay, ken Del Pilar tapno mangiwaras kadagiti relief goods kadagiti biktima iti bagyo.#