CANDON CITY – Iti maikadua a gundaway, bimmisita ti relika ni St. Therese du Lisiueux iti simbaan katoliko ditoy.
Indauluan da Msgr. Vicente Avila, agdama a parish priest, ken ni Candon City Allen Singson dagiti nangpasangbay iti relika a naikabil iti de-sarming a kahon a nailugan iti karuahe a napalikmutan iti sabong.
Nagawit iti banderitas a maris duyaw ken puraw dagiti simmarabo iti relika.
Naaramid ti motorcade agingga iti Bagani Campo ket manipud ditoy, nailibut ti relika agingga iti simbaan a nakaangayan iti misa.
Nagsisinnublat dagiti pagadalan, church organizations ken barbarangay a nagbantay iti vigil ken benerasion manipud alas 11:30ti rabii agingga iti alas sais iti bigat.
Sabali pay a misa ti naaramid iti malem iti Pebrero 4 ken iti alas sais ti bigat ti Pebrero 5. Kalpasanna, naitulod ti relika iti Bangued, Abra.#