Reporma ti kasapulan, saan a pannusa a patay

Gapu kadagiti pammapatay a naisayangkat a nakagudasan iti biag dagiti sumagmamano a biktima, insingasing ti maysa a nangato nga opisial ti PNP ti pannakaisubli ti death penalty.

Imbatad ni PNP Chief Director General Nicanor Bartolome a silulukat iti pannakaisubli a maipakat ti death penalty iti sanguanan ti naisayangkat a panagtakaw iti Robinsons Galleria Mall a nakagudasan ti maysa ken nakasugatan iti innem a tattao.

Singasing laeng daytoy ni Bartolome ngem kas ninamnama, sinupiat ti simbaan ken sumagmamano nga agilinlinteg gapu iti pagtaktakderanda a saan a mapasardeng wenno mapukaw ti kriminalidad babaen ti pannakaipakat ti death penalty.

Iti daytoy a singasing ni Bartolome, kasla pay ketdin annugotenna a saan a kabaelan ti kapolisan a pugipogen ti pannakaisayangkat dagiti krimen. Kasla pay ketdin annugotenna nga awanen ti panagbuteng dagiti kriminal iti kapolisan isu a natureddan nga agisayangkat kadagiti kriminal nga aktibidadda ket ti laeng pannakaipakat ti death penalty ti ti solusion iti panagraira iti kriminalidad.

Ngem kas pagtaktakderan ti simbaan ken dagiti umili a kontra iti death penalty, saan a ti pannakaipakat daytoy ti manglapped wenno mangpukaw iti kriminalidad.

Nasken ketdi ti pannakaipakat iti reporma iti police force kasta met iti judicial system.

Umuna, kasapulan ti propesionalisasion iti Philippine National Police. Kasapulan ti panagsanay ken panagadal dagiti polis ken maaddaanda iti moderno a ramit a pagkalap iti intelligence, armas, ramit-komunikasion ken behikulo tapno nabilbilegda ken maaddaanda iti kapabilidad a makibakal iti kriminalidad.

Maikadua, adu unay dagiti agraira a paltog nga adda iti ikut dagiti grupo dagiti managdakdakes ken dagiti pasurot dagiti politiko ket ad-adda pay koma nga ingetan ti kapolisan ti panagraut, ken panangwara kadagiti armado a grupo iti pagilian.

Maikatlo, padarasen koma ti PNP ti pannakausig dagiti pannakabagi ti linteg a naikappeng kadagiti managdakdakes a grupo wenno sindikato ken nainbolbar kadagiti krimen kas iti panagtakaw, panaghold-ap ken panagpapatay ken dadduma pay nga illegal nga aramid. Dagitoy itta a polis ti mangmangted iti dakes nga imahe iti kapolisan.

Maikapat, kasapulan iti reporma iti judicial system. Saan koma nga agbayag ti pannakausig iti korte dagiti rinuker a polis ket dagus koma a maipakat ti pannusa kadakuada tapno maikkan iti hustisia dagiti biktima.

Mamatikami a no maipakat dagitoy a reporma iti kapolisan ken iti judicial system, saanen a kasapulan a maipakat ti death penalty.#