Footer

Report a nagbayad dagiti politiko permit to campaign fees: di nakapapati, kuna ti NPA

Palso ken saan a nakapapati ti report ti Armed Forces of the Philippines a nagbayad dagiti politiko iti pinullo a million iti NPA, daytoy ti imbatad ti grupo ti NPA nga akinsaklaw iti Ilocos ken Cordillera Region.

Kinuna ni Martin Montana, tagapagsarita ti Chadli Molintas Command, NPA-Ilocos-Cordillera Region, a “palso ken saan a nakapapati ti report ti AFP a nagbayad dagiti politiko iti pinullo a milion a pesos iti NPA” idinto nga “am-amangaw laeng ni Comelec Commissioner Rene Sarmiento a binilbilion ti nakolekta ti NPA manipud kadagiti politiko kas permit-to-campaign wenno permit-to-win fees”.

Iti e-mail nga impatulod ti grupo kadagiti kameng ti media a napetsaan iti Marso 20, 2010, dinakamatna ti report ti AFP a mangibagbaga a nakakolekta ti NPA iti P56.71 milion idi eleksion ti 2004 ken P27.67 milion idi eleksion ti 2007. Dinakamat pay ti statement nga idi Marso 8, inreport ti media a napan iti COMELEC da Maj. Gen. Ruperto Pabustan, komander ti 9th Infantry Division ken dadduma pay a nangangato nga opisial ti AFP tapno dawatenda ti diskualipikasion dagiti kandidato nga atapenda nga agit-ited iti pinansial ken material a suporta iti NPA iti porma iti permit-to-campaign wenno permit-to-win fees.

Innayon ti statement a mapapati a sinuportaran met ni Sarmiento ti report a nakakolekta ti NPA iti P1.5 bilion idi eleksion ti 2004 ken P2 bilion idi eleksion ti 2007 ken mabalin a makakolekta iti P5 bilion iti umay nga eleksion.

Kinuna ti grupo nga “ibilbilang ti NPA dagiti eleksion iti uneg ti reaksionario nga estado kas panagiinnagaw iti poder dagiti nadumaduma a bunggoy dagiti agtuturay a dasig” ket “saan a makipaspaset ken saanna a maikeddeng ti resulta dagitoy nga eleksion”.

Kinuna pay ti statement nga “itantandudo ti NPA a ti pudno a demokratiko nga eleksion a mangisarsarming ti pagayatan ti umili ket maar-aramid kadagiti lokal nga organo ti bileg iti politika a naibangon kadagiti rebolusionario a base kadagiti kaaw-awayan idinto a pinasagidanna ti Comelec nga “agparpartuat kadagiti electoral victories” uray kadagiti kandidato a saan a pinili dagiti tattao”.

Dinakamat ti statement ti pannakaiproklamar ni Pres. Gloria Arroyo idi 2004 kasta met ti pannakaiproklamar da Lilia Pineda, Benjamin Dy ken Roberto Pagdanganan a nangabak iti eleksion idi 2007 maikontra kadagiti nakatugaw a mabigbig a kritiko ti Presidente.

The AFP report that politicians paid tens of millions of pesos to the NPA is wrong and unbelievable. Sarmiento’s statement is truly out of this world (Saan a pudno ken di nakapapati ti report ti AFP a nagbayad dagiti politiko iti pinullo a milion a pisos iti NPA. Amangaw laeng ni Sarmiento ti imbalikasna.), kinuna ti statement.#