Rescuelympics, maangay

VIGAN CITY – Angayen ti gobierno probinsial ti maysa a pasalip mainaig iti panagisalakan ti biag nangruna iti tiempo ti kalamidad inton Hulio 1-3.

Segun ken ni Michael Chan, action officer ti Provincial Disaster Risk Reduction and Management Council (PDRRMC), angayen ti gobierno probinsial nga idauluan ni Gov. Ryan Singson ti nasao a pasalip a pakipartisiparan dagiti MDRRMC manipud iti 32 nga ili ken dua a siudad ti probinsia.

Maangay ti nasao a Rescuelympics kas paset ti pannakarambak iti Disaster Preparedness Month  iti Hulio.

Kinuna ni Chan a babaen ti pannakaangay ti nasao a pasalip, makita ti kinapardas ti ken kinaannayas ti pannakaipakat iti rescue operations dagiti MDRRMCs tapno mapabassit ti bilang dagiti biktima ti kalamidad ken didigra kas iti bagyo ken layus nangruna kadagiti coastal barangay ken adda iti kabambantayan.#