Footer

Reservist, tiniliw ti polis gapu iti panagpaputokna

SANTA, Ilocos Sur – Maysa a reservist iti Philippine Army ti posible a makasuan gapu iti mapapati a panagpaputokna ken gandatna a makiranget kadagiti nagresponde a polis ditoy.

Nasugatan ni Genaro Cacho, Jr., naasawaan, residente iti Barangay Quezon, ket naitaray iti Gabriela Silang General Hospital iti Vigan City.

Sakbayna, nakaawat dagiti polis ditoy iti tip a maysa a lalaki ti nagpaputok iti Barangay Quezon ket nagturongda iti nasao a lugar tapno agpalutpotda.

Idi asitgan dagiti polis ni Cacho, mapapati a nagbassawang daytoy sana ginandat nga asuten ti paltogna ngem tinukmaan ti maysa a polis ti ima ti suspetsa a puon ti nakatnagan ti paltog.

Mapapati a pimmutok ti paltog ket napuntaan ti makannigid a saka ti suspetsa.#