VIGAN CITY – Naisayangkat itay nabiit ti reshuffling dagiti election supervisors ti Commission on Elections iti Region 1 para iti natalna ken naseguridad a panagpipili inton Mayo 2013.
Naidestino ni Ilocos Sur Comelec Provincial Supervisor Rhodora Ines Arrocena sadiay La Union ket sinuktanna ni Election Supervisor Joel Ines a naiyalis sadiay Ilocos Norte a nangsuktanna ken ni Alipio Castillo III a naibaon iti Ilocos Sur.
Kabayatanna, naiyalis ni Comelec Regional Director Noli Pipo iti Region 10 idinto a simmukat kenkuana ni Election Officer Ederlino Tabilas.
Sapasap a naisayangkat ti reshuffling dagiti election supervisors idi Enero 4 kas paset ti pammilin ti Comelec Central Office tapno masigurado ti kredibilidad ti masungad a panagpipili inton Mayo 13, 2013.#