Footer

Resolusion a mangital-o day workers, paidaras ti bise gobernador a mapirmaan

VIGAN CITY – Saan pay a napirmaan ti resolusion nga inaprobaran ti sangguniang panlalawigan a mangital-o iti kasasaad dagiti day care workers iti probinsia idinto a naidanonen ti liga dagiti bise gobernador ti gakat iti Kongreso.

Iti interbio ni Vice Gov. Jerry Singson ken ni Jun Ramos iti programana a JCS, Kakibin ti Balligi, kinunana nga iti panangdamagna iti estado ti nasao a resolusion, natakuatanna a saan pay a napirmaan ta adda pay daytoy iti executive department.

Kinuna ti bise gobernador nga iti sabali a bangir, sangsangkamaysa dagiti bise gobernador a nangaprobar iti resolusion idi indatagna daytoy iti asemblea ti ligada a bise gobernaddor idi Sept. 3 ken inkarida nga isuda ti mangidanon iti gakat iti Kongreso.

“Naidanonen ti kameng ti Vice Governor’s League of the Philippines iti Kongreso isu a kayatko koma met nga umun-una da Cong. Ronald (Singson)ken Cong. Eric (Singson) ngem daksanggasat ta daytoy ordinario a resolusiontayo ditoy probinsia, di pay dimmanon kadakuada,” inlagidaw ti bise gobernador.

Iti gakat a kayat ni Singson a maipila iti Kongreso, mapagbalin a permanente ti posision dagiti day care workers ken maikkanda iti umisu a sueldo.

“Voluntary ngamin ti status ti day care workers ket honorarium ti sueldoda,” inlawlawag ni Singson.

Kinuna ti bise gobernador a gapu ta honorarium laeng ti sueldo ti day care worker, ti laeng kayat nga ited ti barangay wenno munisipio.

Kinuna ni Singson nga ibagbaga ti national government a rumbeng a papigsaen ti day care ta dayta ti kapintasan a pagrubbuatan ti maysa nga ubing ngem iti baet a bigbigenda ti importansia ti day care, awan met ti itedda a naan-anay a sueldo dagiti day care workers wenno saanda met nga ikabil a permanente.

“… Ti kayattayo a maaramid, no bigbigenda met laeng ti day care, papintasenda ti programa, iramanda dagiti day care workers, ikkandan iti permanente a posision iti gobierno ken ikkandan iti umisu a sueldoda tapno “nagaggaget, nalalaingda manen a mangisuro kadagiti ubbing,” kinuna ni Singson.

Innayon ni Singson a ti “umuna a masursuro ti ubing, sumagepsep iti panunotna, isu nga itedtayo kenkuana ti kapipintasan” sana inyunay-unay a ti “pundasion ti ubing nga agbasa ti kaimportantean iti amin.”

“Daytoy ti gapuna a karkarintarek ti secretariat (pannakapirma ti resolusion) tapno aggigiddanda ta dinto ket agsidsiddaaw dagiti dua a congressmantayo no maunaanda,” kinuna ni Singson.#