Resolusion dagiti kaso ti pammapatay kadagiti barangay officials, naibilin

CAMP ELPIDIO QUIRINO, BANTAY, Ilocos Sur – Lima a hepe ti polis ditoy probinsia ti nabilin a mangsolbar kadagiti kaso ti pammaltog a naisayangkat iti hurisdiksionda a nakapapatayan dagiti barangay officials.

Imbilin ni OIC Provincial Director Police Senior Supt. Reynante Partible kadagiti hepe ti polis ti Narvacan, San Juan, Sinait, Sta. Cruz ken Vigan City ti madagdagus a panangisubmiteda iti aksion nga inwayatda mainaig kadagiti pammapatay a naisayangkat iti hurisdiksionda a nakagudasan dagiti barangay officials.

Sakbayna, nakaawat ti provincial police office ditoy iti memorandum a naggapu iti regional director para iti resolusion dagiti kaso ti pammapatay kadagiti nadakamat a barangay officials.

Partikular a nadakamat iti pammilin dagiti napapatay a barangay officials a pakairamanan ni Daclapan, Cabugao Barangay Captain Wilfredo P. Terrago iti asideg ti provincial capitol iti uneg ti Vigan City, ni Santos Cardona iti Narvacan, ni Zacarias Viloria ti San Juan, Rey Florendo , Sr. iti Sta. Cruz, ken ni Diomedes M. Rosete iti Sinait.

Napapatay ni Terrago iti mismo nga asideg ti provincial capitol idi pasado alas dose ti Abril 11 agraman ti maysa a polis ken nakasugatan ti maysa a bystander.

Gapu iti nagsasaganad a pammapatay iti probinsia, nangruna iti pannakapapatay ni Terrago iti asideg ti provincial capitol, nakaunget ni Gov. Luis “Chavit” Singson a nagtungpal iti pannakarelibo ni Police Supt. Elpidio Nartatez a hepe ti polis ti Vigan City ken ni Police Senior Supt. Eduardo Dopale a provincial director.

Ni Partible ti nangsukat ken ni Dopale.

Imbilin ni Partible ti madagdagus a resolusion dagiti nadakamat a di pay nasolbar a kaso, pannakabigbig ken pannakaaresto dagiti suspek ken evidence warrants, ken pannakaipila ti maikanatad a charges maikontra kadaditi nagisayangkat iti krimen.

Linaon pay ti pammilin ti panangisubmite dagiti hepe ti polis dagiti nadakamat nga ili ken siudad dagiti resulta ti aksion nga inwayatda para iti pannakasolbar dagiti nadakamat a kaso ti pammapatay iti provincial director para iti pannakakonsolidarda sakbay a maidatag dagitoy iti Directorate for Investigation  and Detection Management.

Naikkan dagiti maseknan a police officials agingga iti Hulio 17 a mangisubmite ti resulta dagiti inwayatda nga aksion para iti resolusion ti kaso ti pannakapapatay dagiti barangay officials.#