Resolusion a maaramat ti Iloko bayat ti session ti SP, naaprobaran

VIGAN CITY – Naaprobaran itay nabiit ti maysa a resolusion a mangguyugoy iti panagusar iti Iloko uray bayat ti deliberasion para iti pannakaipasa dagiti ordinansa ken resolusion iti sangguniang panlalawigan ditoy.

Ni Bokal Edgar Yabes, chairman ti committee on culture and arts, ti nangipresentar iti pannakaaprobar ti nasao a resolusion a pinutar ni Vice Gov. Deogracias Victor Savellano.

Kas sinaguday ti nasao a resolusion, ti Ilokano ti pagsasao ti nasurok 9 milion a tattao iti pagilian kas maibatay iti Census idi 1987, malaksid laeng dagiti napan nagtrabaho iti ballasiw-taaw.

Idi 2012, nangipasa ti La Union iti ordinansa a mangbigbig iti Ilokano wenno Iloko a kas opisial a pagsasao ti probinsia kabayatan a ti Filipino ken Ingles ti nasional ken opisial a pagsasao iti pagilian.

Kinuna ni Yabes a babaen ti nasao nga ordinansa, ti Ilocos Sur ti umuna a probinsia a mangted iti importansia iti Iloko babaen ti pannakausarna bayat ti deliberasion para iti pannakaipasa dagiti ordinansa ken resolusion iti sangguniang panlalawigan.#