Resolusion ti sisterhood ti Caoayan, Makati City, naipaima ken ni Binay

CAOAYAN, Ilocos Sur – Maysa a resolusion ti inyawat dagiti agtuturay ditoy ken ni Vice president Jejomar Binay para iti tarigagayda nga agbalin a sister town daytoy nga ili ti Makati City.

Bimmisita ni Binay ditoy nga ili idi Nobiembre 16, pannakalagip ti maika-120 a panagkasangay daydi nag-Presidente Elpidio Quirino.

Nagmayor ti Makati City ni Binay sakbay a nagkandidato ken nangabak a bise presidente.

Ni Jejomar Erwin Binay, anak ti bise presidente ti agdama a mayor ti Makati City.

Kinuna ni Mayor Germie S. Goulart a dakkel ti maitulong ti Makati City a pagsayaatan ti Caoayan no agbalin a sister town ti nasao a siudad.#