Resort house, maar-aramat iti online gaming?

VIGAN CITY – Saan a cyber sex den ti resort nga ininspeksion dagiti polis ken ahensia ti city government sadiay Barangay Bongtolan ditoy siudad idi Mayo 20, daytoy ti inlawlawag ti hepe ti polis ditoy siudad.

Linawlawagan pay ni Police Superintendent Maximo Taclas a saanda a rinaut ti nasao a resort house no di ket maysa nga inspeksion ti insayangkat ti composite team ti kapolisan ken ti city government kas paset ti regular inspection nga ang-angayenda kadagiti business establishments iti siudad.

Kinuna ni Taclas a saan a naggapu kadakuada ti impormasion a maysa a cyber sex den ti Mom’s Courtyard, kas nailanlanad kadagiti aginaldaw a pagiwarnak.

Iti pannakiuman kenkuana iti programa ni Jun Ramos a Barangay Commando Brigada a naipatangatang iti DWRS, linawlawagan ni Taclas nga ad-adda a patienna a saan a cyber sex ti maisaysayangkat kadagiti nadumaduma a cottages iti nasao a resort house no di ket online gaming.

Iti insayangkat nga inspeksion ti nagtipon a bunggoy ti polis, licensing office ti city government, health ken Bureau of Fire Prevention iti Mom’s Courtyard, nasukalanda ti kaadda dagiti Taiwanese ken Chinese nationals iti uneg ti resort ket iti panagusisada, nakitada iti uneg dagiti cottages dagiti telephone booths, routers, ken electronic devices, isu a nagsuspetsada iti posible a kaadda iti illegal nga aktibidad a maar-aramid sadiay.

Kinuna ni Taclas nga agsipud ta saanda nga eksperto, kiniddawda ti Anti-Cyber Crime Group iti Camp Crame nga agimbestiga mainaig iti naduktalanda ket base iti inisial nga ebaluasion ti grupo, mapapati nga adda nalabsing a paglintegan ti pagilian, kas iti RA 8792 wenno e-Commerce Law.

Gapu iti daytoy, nagaplikar da Taclas iti search warrant iti korte ket apaman a naalada, dinagdagusda nga inserbi iti nasao a resort tapno makumpiskada dagiti electronic devices ken gadgets kadagiti cottages tapno maammuan no maar-aramatda iti illegal nga aktibidad.

Naammuan nga agdagup iti 40 a Taiwanese ken 12 a Chinese nationals dagiti nasukalan nga aggigian iti nasao resort house.

Maysa a Mr. Arde ti mapapati nga akinkukua iti resort house. Segun iti hepe ti polis, adda permit ti Mom’s Courtyard a kas maysa a resort ngem awan permitna para iti sabali pay a negosio kas koma iti call center.

Kasta met nga iti panagpalutpot dagiti polis, mapapati a pito kadagiti ganggannaet ti awan naidatagda a pasaporteda.

Inalaan pay dagiti polis iti palawag ti maysa a Jackson Chan, mapapati a cook dagiti Taiwanese, no ania ti ammona mainaig kadagiti aktibidad dagiti Taiwanese.

Kinuna pay ni Taclas a dida unay naalaan iti palawag dagiti Taiwanese ken Chinese nationals agsipud ta kiniddaw dagitoy ti pannakaited kadakuada ti serbisio ti abogadoda.

Innayon ni Taclas nga impaimada dagiti Taiwanese iti Bureau of Immigration agsipud ta daytoy ti maikanatad nga ahensia a mangiggem kadakuada.

Nupay kasta, kinumpirmaran ti BI nga in order dagiti pappapeles dagiti Taiwanese.

Kasta met a dinawat ti abogado dagitoy a maruk-atanda a dagus gapu ta awan ti balido a rason a tenglen ida ti imigrasion.

Kinuna ni Atty. Melver Tolentino, abogado dagiti ganggannaet a turista, nga authentic dagiti pasaporte dagiti klientena, saan a nagpaso dagiti pasaporte wenno bisada ken awan ti overstaying kadakuada ket awan ti pagbatayanda a mangtengngel kadakuada.

Innayon pay ni Tolentino nga awan ti pammaneknek a naaramat iti illegal nga aktibidad dagiti gadgets a kinumpiska dagiti polis kadagiti klientena ken awan ti droga a nasukalan iti ikutda.

Kinuna ni Tolentino a mabalin a masaklangan iti administratibo ken kriminal ti PNP maigapu iti illegal a pannakadetene dagiti klientena nga awan ti kaso a naipila maikontra kadakuada.

Kabayatanna, kinuna ni Paul Verzosa, hepe ti imigrasion iti Laoag, nga awan ti ground tapno tenglenda dagiti foreign nationals isu a masapul a maruk-atanda a dagus.

Innayon ni Verzosa a kasapulan a natanang ti panangiggemda iti nasao nga isyo agsipud iti agdama a di panagkinnaawatan iti nagbaetan ti Pilipinas ken Taiwan maigapu iti pannakapaltog ti maysa a Taiwanese a mangngalap a nakatayanna.#