Resthouse, sinerrek dua mannanakaw

BANTAY, Ilocos Sur – Dua a mannanakaw ti nangserrek iti maysa a resthouse iti Barangay Taguiporo, ditoy nga ili idi parbangon ti Hulio 3 ket intarayda ti dua a bag a naglaon kadagiti ramit-komunikasion, ID ken kuarta.

Segun iti report manipud iti polis-Bantay, dua a lalaki ti nangserrek iti kiosk/resthouse a naipatakder iti talon a kukua ni Victor Raymund Alave, residente iti Barangay 6, Vigan City ket intarayda ti maysa a shoulder bag a naisab-it iti kawayan a tugaw a naglaon kadagiti personal a sanikua ni Almira Alave y Quisano, 43, naasawaan, caretaker ti nasao a talon, a naglaon iti dua a selpon nga agpateg iti P6,000.00, maysa a nangisit a PSP nga agbalor iti P10,000.00, cash nga agdagup iti P3,000.00 ken maysa a berde nga sling bag a kukua ni Myla Alave y Callejo, 27, naasawaan, daughter-in-law ni Almira a  naglaon kadagiti ID cards, driver’s license ni John Ray Alave y Quisano, 25, dua a relo ken cash a P5,000.00 a naikabil iti baba ti lamisaan iti kuarto a pagturogan dagiti Myla ken  John Ray.

Iti panagimbestiga dagiti polis, napuotan ni Alave nga addan iti sala dagiti dua a di nabigbig a mannanakaw a dagus a naglibas iti saan nga ammo a direksion a baklayda dagiti bag.

Mapapati a simrek dagiti mannanakaw iti kiosk/resthouse iti paset ti tarpaulin a nakalukat.

Nakarekobre dagiti polis iti dua a paris ti sinelas a kolor berde ken asul ken maysa nga screw driver iti uneg ti resthouse.

Nagsawar dagiti nagresponde a polis ngem saandan a nasapulan dagiti mannanakaw.#