Retirado a polis napaltogan, natay

VIGAN CITY- Maysa a retirado a polis ti pinaltogan ti uppat a lallaki a nakamotorsiklo iti malem ti Disiembre 16 iti Barangay Ayusan Sur ditoy siudad ket saanen a naidanon ti biagna iti ospital.

Awanen ti biag ni Dionisio Aquino, 59, naasawaan, retired policeman, agnaed iti Barangay Bulala ditoy siudad idi maisangpet iti Metro Vigan Cooperative Hospital gapu iti patal a sugatna iti barukongna.

Segun iti report, agdaldaliasat ni Aquino iti barangay road a sakup ti Ayusan Sur a nakalugan iti traysikelna idi pinaltogan dagiti simmaruno kenkuana a di pay nabigbig a lallaki a nagkasakay iti dua a motorsiklo.

Nakarekobre dagiti inbestigador iti maysa a kapsula manipud iti cal. 45 ken magasin a nagkarga iti uppat a bala iti nakapasamakan ti krimen.

Di pay ammo ti motibo ken kinasiasino dagiti kriminal.#