Retirado a militar, natakawan

SANTA, Ilocos Sur – Sinerrek ti mannanakaw ti balay ti maysa a retirado nga Army man ket kinurimesda ti iduldulinna a paltog.

Nagpulong iti polis ni Jaime Criste y Balbuena, Sr.,  64, retirado iti Philippine Army, Barangay Mabilbila Sur, ditoy nga ili, a natakaw ti iduldulinna nga Armscor Cal 9mm pistol a suspetsana nga innala dagiti mannanakaw a simrek iti balayna bayat ti kaawanna.

Segun iti biktima, idi agarup 2:15 ti malem ti Septiembre 3, napan iti barangay plaza ta adda naibunong a relief goods ket idi agsubli iti balayda, naduktalanna a napilit a naluktan ti akinlikud a ridaw.

Idi sinukimatna dagiti gargaretna, awanen ti paltogna.

Saan pay nga ammo ti kinaasino ti mannanakaw a simrek iti balay ni Criste.#