Retirado nga empleado, nakalasat iti pammaltog, apona ti nagudas

BANTAY, Ilocos Sur – Nalasatan ti maysa a retirado a kameng ti tax commission ti mapapati a pannakagandat ti biagna ngem ti apona ti nagudas iti pammaltog iti bigat ti Enero 19 iti Sitio Baoay, Barangay Paing ditoy nga ili.

Pinaltogan dagiti armado a tattao a nagkalubbon iti motorsiklo ni Jaime Bueza y Cuneta, 70, naasawaan, dati a presidente, general manager ti Nationwide Security and Allied Services, Inc., retirado a miembro ti Joint Legislative Executive Tax Commision ken residente iti Barangay Manueva, Santa, Ilocos Sur bayat ti panagdaliasat ti Toyota GLI a luganna iti nadakamat a barangay.

Nagsagrap ni Bueza iti sugat gapuanan iti shrapnel iti makannigid a lapayag ken makannigid nga imana ket naitaray iti Metro Vigan Cooperative Hospital ken ti kinaluganna nga apona a nainaganan Alyza Marie Soria y Manongsong, 19, balasang, 3rd year BSBA student ti St. Paul College, Bantay ngem naideklara ni Alyza nga awanen ti biagna idi maisangpetda iti nasao nga ospital.

Iti panagimbestiga ti polis, inobertekan dagiti suspek ti lugan ni Bueza bayat ti panagdaliasatna iti Sitio Baoay, Barangay Paing, Bantay sada pinaputokan ti biktima iti sumagmamano a daras. Mapapati a nagrukob ti lakay iti damo a putok ket iti kueliona ti nagdalanan ti bala a nagderetso iti bagi ti balasang a puon ti nakatayanna.

Nakarekobre ti SOCO team nga indauluan ni Police Supt. Daniel Dingel Coronel iti tallo a metal fragments, 2 a bullet jacket iti saan pay masinunuo a kalibre ti paltog iti nakapasamakan iti krimen.

Mapapati a ni Bueza ti puntiria dagiti armado a tattao a papatayen.

Ngem idi pinadas ti lokal a media nga alaen ti palawag ni Bueza, nagkedked daytoy a mangited iti statement agsipud ta di pay timmalinaay ti riknana gapu iti napasamak.

Segun ken police investigator Joel Javier ti Bantay police station, kitkitaenda ti anggulo a pannakainbolbar ti partes ti biktima iti maysa nga insidente iti kallabes nga adda pakainaiganna iti pammaltog.

Kinuna pay ni Javier nga adda saksi a nakailadawan ti kolor ti motorsiklo a nagluganan dagiti suspek.

Nupay kasta, nagkedked ni Javier a mangibaga iti kinaasino ti saksi tapno saan a masakbayan ti panagimbestigada.

Kinuna pay ti inbestigador nga ikkanda iti seguridad a polis ti biktima no agkiddaw daytoy.#