Retirado nga empleado, napaltogan iti uneg ti balayna

SAN JUAN, Ilocos Sur – Pimmusay ti maysa a retirado nga empleado ti bangko iti ospital a nakataminganna sumagmamano nga aldaw kalpasan ti pannakapaltogna iti uneg ti balayna iti Barangay Refaro ditoy nga ili idi rabii ti Septiembre 24.

Pimmusay ni Mario Alonzo y Arizabal, 64, naasawaan, retirado nga empleado ti Allied Bank ken residente iti nadakamat a barangay, gapu iti sugatna iti makannawan nga abagana maigapu iti pannakapaltogna bayat ti panagbuyana iti telebision iti uneg ti balayna idi agarup alas 7:00 ti rabii ti Septiembre 24.

Mapapati a nagpuesto ti di pay nabigbig a suspek a nangpaltog iti biktima iti likudan ti nakaserra a jalousie ti tawa iti abagatanen a paset ti balay.

Madama ti inbestigasion mainaig iti nasao a pammaltog.#