Footer

Retired PNP member, napapatay

CANDON CITY – Sinaneb ti uppat nga armado a tattao ti maysa a retirado a polis iti asideg ti pagtaenganna iti Barangay Bugnay ditoy a nakaigapuan ti insigida nga ipapatayna.

Natay ni Manuel Digyao, 60, residente iti nadakamat a barangay gapu kadagiti sinagrapna a sugat iti barukongna.

Iti inisial nga inbestigasion dagiti pannakabagi ti linteg, kagapgapu ti biktima manipud iti sentro ti Candon ket  agawiden iti barangayda  a nakasakay iti motorna idi nagparang ti  uppat a lalaki nga armado sada pinaltogan ti biktima.

Idi naidasay ti biktima, mapapati nga inasitgan dagiti suspetsa sada ginudas.

Nakarekobre dagiti polis iti 10 nga empty shell ti kalibre .45 ken 1 a kapsula ti 9mm iti nakapasamakan ti krimen.

Kabayatanna, dua a paltog ti nakumpiska dagiti pannakabagi ti linteg iti nagsina nga operasion nga insayangkatda ditoy siudad itay nabiit.

Natiliw iti ikut ni Santos Ragasa, residente iti Sta. Catalina, Ilocos Sur, ti maysa a homemade one pong, kalibre 5.56 nga addaan maysa a bala  ken lima a bala bayat ti Operation Bakal nga insayangkat dagiti polis iti Kalapaw Videoke Bar iti Paras, ditoy met laeng a siudad.

Iti sabali nga operasion, nakumpiska ken ni Joseph Ravalo, 34, residente iti San Jose, Candon City ti maysa a homemade caliber 357 magnum revolver nga addaan bala.

Insayangkat dagiti polis ti operasion ken ni Ravalo kalpasan a nakaawatda iti text message manipud iti maysa a di ammo nga umili.

Naipilaan dagiti nasao a masuspetsa iti kaso a panaglabsing iti RA 8294 wenno illegal possession of firearms and ammunitions.#