Footer

Review center, adda probable cause a maidarum iti estafa

BAGUIO CITY – Kinuna ti opisina ti city prosecutor ditoy nga adda probable cause tapno makasuan iti estafa ti maysa a review center ditoy.

 

Segun iti resolusion ni City Prosecutor Octavio Banta a naiparuar idi Mayo 16, adda probable cause para estafa maikontra iti Northcap Review Center gapu iti “panangirepresentarna iti bagina nga addaan iti autoridad, bileg, inpluensia ken kualipikasion nga agproseso ken mangpadaras  iti pannakaaprobar dagiti aplikasion dagiti nagreklamo iti licensure examinations nga angayen ti Professional Regulatory Commission (PRC)” gapuna a “nagbayad dagiti complainants ngem nagtungpal a saan a pudno daytoy ta saanda met a nairaman iti listaan dagiti ageksamen para iti Midwifery board exam idi Abril 29 ken 30”.

Inreklamo dagiti aplikante ti nasao a review center kalpasan a saanda a nairaman iti listaan dagiti ageksamen iti midwifery board exams a naangay idi Abril 29 ken 30 idinto a nagbayadda iti daytoy para iti pannakaproseso ken pannakaaprobar iti aplikasionda.

Kabayatanna, impeksa  dagiti opisial ti Northcap ti panagpadispensarda kadagiti nagrebio, nagannak ken autoridad ti pagadalan, idinto a dinawatda a kayatda ti makiareglo kadagiti complainants.

Intanggayada a maisubli kadagiti complainants ti pleteda, processing fee, lodging ken review fees.

Kadagiti non-ladderized midwifery course, kinuna ti Northcap a madadaan a mangirefund iti P31,300 tunggal maysa.

Kadagiti nagturpos iti midwifery a kayatda ti agtuloy iti nursing, umawatda iti P115,000 ken maikkanda pay iti free review, NCLEX, Ielts, CGFNS review, libre a panangaramat iti laboratorio ken libre a review materials.

Kadagiti nagturpos iti nursing, umawatda iti P84,000, segun dagiti opisial ti review center.#