RHU nangrugin ti serbisiona

BANAYOYO, Ilocos Sur – Nalpasen ti rural health unit daytoy nga ili ket mangrugin a maipaay ti serbisio ti salun-at kadagiti agindeg, kinuna ni Deborah Vicente, nurse.

Segun ken ni Vicente, nasimpa ken napalawa ti laboratorio ti health unit ken nababbaba ti singir ditoy no maikumpara kadagiti ospital.

Kinunana a P40 laeng ti singirenda a bayad iti urinalysis, P50 iti complete blood count ken P50 iti sputum microscopy.

Impalgak ni Vicente a maysa kadagiti kayatda a maipatakder ditoy ti lying-in clinic wenno pagganakan.

Iti agdama ket adda gatgatangen ti munisipio a lote a pagpatakderan iti lying-in clinic.#