Rice terraces, inlista ti UNESCO nga endangered world heritage site

BANAUE, Ifugao – Karaman ti rice terraces ditoy iti baro a listaan ti United Nations Educational, Scientific and Cultural Organization (UNESCO) nga endangered world heritage sites gapu iti pannakabaybay-ana.

Kanaig daytoy, nagpatulong ni Mayor Jerry Dalipog iti nasional a gobierno ken ti internasional a komunidad para iti pannakapreserba ti nasao a world heritage site a kangrunaan a bisbisitaen dagiti turista ditoy.

Kinuna ni Dalipog a nabaybay-an dagiti rice terraces iti lugarda agsipud ta saan metten a taltalonen dagiti akinkukua ta lallakaydan kasta met a dagiti annakda ket agbasbasada iti siudad wenno nakabirokdan iti panggedanda iti sabali a lugar.

Kinuna pay ni Dalipog a no agtuloy a mabaybay-an dagiti rice terraces, awanton ti pategda kadagiti turista agsipud ta awanto metten ti makitada a naraepan a natukantukad a kataltalonan.#