Ridaw ti kusina, nauram gapu iti gas leakage

ALILEM, Ilocos Sur – Leakage ti gas ti nakaigapu iti pannakauram ti ridaw ti maysa a pasdek iti Barangay Alilem Daya ditoy nga ili idi aldaw ti Disiembre 14.

Daytoy ti inisial a resulta ti panagimbestiga dagiti polis mainaig iti pannakauram ti ridaw ti kusina ti Credit Multi-Purpose Cooperative Building a naireport idi agarup 11:00 ti bigat ti nadakamat a petsa.

Kas inreport ni Lopez Sali-a y Taule, guardia ti nasao a pasdek, aglutluto iti kusina idi kellaat a dimmarang ti burner ti gas stove.

Dagus a nagpaarayat ni Sali-a ken ni SPO1 Jerome Bangaoil a nairana a mangiwaywayat iti intel monitoring iti asideg ket dagus met a dinepdep daytoy ti apuy babaen ti fire extinguisher.

Segun iti polis, simgiab ti gas stove gapu iti panagsawaw ti hose.#