Footer

Riding-in-tandem a suspek iti pammapatay, naipiskot dagiti polis

CAMP BGEN OSCAR M FLORENDO, San Fernando City – Dua a riding in tandem suspects iti pannakapapatay ti maysa a residente iti Barangay Alacan, San Fabian, Pangasinan ti naipiskot dagiti polis sadiay San Jacinto iti nasao met laeng a probinsia idi Agosto 12.

Kinuna ni Police Chief Superintendent Franklin Jesus B. Bucayu, regional director ti PRO1, a natiliw iti rangtay ti Barangay San Vicente, San Jacinto babaen ti nadaras a panagresponde dagiti polis dagiti suspek a da Albert F. Chan, 21, naasawaan, residente iti Nibaliw East, San Fabian ken Randy A. Acosta, 24, baro, ken agnaed iti  Bagong Pag-asa, San Jacinto,  Pangasinan.

Dagiti dua ti masuspetsa a pimmaltog ken ni Rodel B. Pascua, 49, naasawaan, ken residente iti Barangay Alacan, San Fabian, Pangasinan. Naitaray ni Pascua iti Region I Medical Center iti Dagupan City ngem naideklara nga awanen ti biagna idi maidanon iti nasao a balay-pagagasan.

Nakarekobre ti Scene of the Crime Operatives (SOCO) iti nakapasamakan ti krimen iti 15 a kapsula ken maysa a deformed slug a nagtaud iti cal .45.

Segun iti report a dimmanon iti Police Regional Office 1 ditoy, nairana a limmabas ni Police Senior Inspector Amor Somine, chief of police ti San Jacinto iti asideg ti nakapasamakan ti krimen ket dagus nga imbilinna kadagiti polis iti babaenna ti panangisayangkatda iti dragnet operation maikontra kadagiti suspek a nagtungpal iti pannakatiliwda iti rangtay ti San Vicente iti San Jacinto.

Iti pannakaisurat daytoy, adda dagiti dua a suspek iti kustodia ti polis San Fabian bayat ti pannakaisagana ti kaso a murder maikontra kadakuada.

Naipakatan metten dagiti dua iti paraffin test tapno mapatalgedan no positibo dagiti imada iti pulbora.

Kabayatanna,  kas pammilin ni Bucayu, binuangay ti Pangasinan police  itay Agosto 12 ti maysa nga investigation task group a mangiwayat iti in-depth investigation iti pannakapapatay ni Alaminos City ABC President Reynaldo E. Sagana idi rabii ti Agosto 11.

Natudingan ni Senior Superintendent Mariano Luis M. Verzosa Jr., Office-in-Charge of Pangasinan PPO, a mangidaulo iti Special Investigation Task Group (SITG) “Sagana” a mangpalutpot iti pannakapapatay ti ABC president.

Agpaay a kameng iti task force dagiti officers ti Provincial Crime Laboratory, Criminal Investigation and Detection Group (CIDG), ken ti Regional Intelligence Office (RIO).

Pinaltogan ti di pay nabigbig a suspek ni Sagana, 43, naasawaan, ken residente iti Barangay Boboy, Agno, bayat ti kaaddana iti  arubayan ti Hidden Paradise Videoke Bar a masarakan iti Barangay Amandiego, Alaminos City.

Naideklara ni Sagana a natayen idi maidanon iti Alaminos Doctor’s Hospital iti Barangay Bolaney gapu iti grabe a sugatna iti ulo ken barukong.

Nakarekobre dagiti inbestigador iti crime scene iti uppat a buli manipud iti cal .45 pistol.#