Riknaen ti espiritu ti Paskua

DUA nga aldaw laengen, dumtengen ti kaaldawan ti Paskua a panangrambak dagiti Kristiano iti intero a lubong iti pannakaipasngay ti mannubbot iti sangalubongan ni Apo Jesucristo, idi nasuroken a dua a milenio ti naglabas sadiay Betlehem. 

Iti likudan dagiti nangayed ken nagduduma a wagas ti panagrambak iti Pilipinas a kangrunaan a nasion dagiti Kristiano Katoliko iti Asia, kasapulan a lagipen ken riknaen ti kaipapanan wenno espiritu ti Umuna a Paskua idi iyanak ni Birhen Santa Maria ti maladaga a Jesus nga anak ti Dios babaen ti Espiritu Santo.

Agduma unayen ti panagrambak iti Paskua iti agdama a tiempo a napnuanen iti kinamaterialismo ken kinakomersialismo a kasla awanen wenno kurangen ti kaipapanan ti Paskua no awan dagiti adu a padaya, aglaplapusanan a taraon ken mainum, agkakangina a regalo, bonus ken dadduma pay a nainlubo-
ngan a pagragsakan. Maipapaigiden ti kaipapanan ken espiritu ti Umuna a Paskua – ti pannakaitao ni Niño Jesus nga Anak ti Dios tapno subbotenna iti basol ti sangaparsuaan.

Uray Anak Isuna ti Dios, naipasngay ni Jesucristo a nanumo iti kulluong dagiti dinguen iti rukib iti sidong dagiti karnero gapu ta awan ti nangpasangbay kadagiti nagannak kenkuana a da Jose ken Maria iti panagdaliasat ken panagpasngayna. Dagiti immuna a bimmisita iti Maladaga a Mesias ket dagiti nanumo nga agpaspastor iti karnero. Simmaruno dagiti tallo a mago wenno masirib a naggapu iti Daya a nangisangpet kadagiti regaloda a nangsurot iti bituen kas bagnosda tapno makita ken makapagdaydayawda iti Mesias.

Kabayatan ti panaglabas dagiti tawen, adu ti nagbaliwan dagiti tattao manipud iti daydi Umuna a Paskua agingga iti Umuna a Semana Santa a naparparigat ken napapatay ni Jesucristo iti krus gapu iti panangikasabana iti Pagarian ti Dios. 

Iti ipapatay ken panagungar ni Jesucristo, inkarina nga umayto manen iti lubong tapno kednganna dagiti natudio ken nagsukir kadagiti bilin ken pagayatanna.

Ti panangiyur-uray dagiti Kristiano iti maikadua ken maudi nga idadateng ni Jesucristo iti lubong iti ramrambakan ken sagsaganaan dagiti Kristiano iti Paskua wenno Adviento.

Iti panaglabas dagiti tawen a panagrambak ket nagbaliwen ti panangselebrar iti Paskua ket naiturongen kadagiti nailubongan a pasken, imbes nga iti panangibiag iti kaipapanan ken espiritu ti Paskua. Nanumo ti panagbiag ni Jesucristo manipud iti  pannakayanakna iti kulluong agingga iti pannakaibayog ken ipapatayna iti krus.

Adda kadi pay nanumnumo a pannakaipasngay ngem iti mayanak iti apon dagiti ayup? Adda kadi pay narangranggas nga ipapatay ngem ti maduyok a nakabitin iti krus?

Ipampanakkel dagiti Pilipino a ti Pilipinas ti kangrunaan a nasion dagiti Kristiano iti Asia ta buklen daytoy dagiti nasurok a 90 Million nga umili, ken 80 a porsiento kadakuada ket Katoliko. Ngem iyanninaw ti kinauneg ti pammatida iti Dios babaen iti wagas ti panagrambakda iti Paskua. Nagpaiduman iti wagas a panagrambak dagiti adu a tattao iti Panawen ti Paskua nga ubbawen ti panagselebrar ken panagragsak no kurang wenno awan dagiti nainlubongan a banag. Adda dagiti mangikagumaan ti agaramid iti kinadakes kas ti panagholdap wenno panagtakaw tapno laeng maaddaanda iti igatang iti regalo wenno pagsaganada iti tiempo ti Paskua. Dayta ti gapu a maibasar iti tinawen a record ti Philippine National Police ket umadu dagiti kaso ti panagtakaw ken panagholdap no umasidegen ti Paskua. No Panawen ti Paskua, agraira met dagiti peke weno bogus a kuarta ken dagiti peke ken sub-standard a produkto a mangipakita ti kinadakes dagiti dadduma a tattao. Uray dagiti dadduma nga opisial ken agserserbi iti gobierno, agtultuloy met ti kinakunniber ken kinadakesda a mangiyibus kadagiti nabati a pondoda ta no saanda a magasto ket maisublida iti National Treasury.

Nagadu dagiti aglaplapusanan a babaknang, ngem ad-adu pay dagiti awanan a bagida laeng ti umap-apal ta napaidamanda iti kinagasat. Kabayatan nga agragrag-o dagiti dadduma iti kaadu dagiti bonus ken ragalo dagiti adda iti gobierno, agam-ambing laeng dagiti adda iti pribado a sektor nangruna dagiti awanan iti trabaho ken pagsapulan. Dagiti napanglaw, gundawayanda ti Paskua ti agkiddaw kadagiti aginaldo kas makita dagiti adu a Badjao, Aeta ken marigrigat nga agkaiwara kadagiti kalsada tapno makilimos wenno makipaskuada kadagiti nasaysayaat ti gasatda.  

Ayat ti espiritu ti Paskua. Nayanak ken timmao ni Jesucristo gapu iti ayat ti Dios iti sangalubongan tapno maispal dagiti tattao iti lubong. Ngem marikna kadi ti pudno nga ayat dagiti tattao nangruna dagiti Kristiano iti Panawen ti Paskua no adda dagiti aglaplapusanan iti kinagarbo ti panagbiag, ngem adda met dagiti nakakaasi ti kasasaadda? Adda kadi ayat iti Paskua no agtultuloy dagiti kurapsion iti gobierno?

Uray Paskuan, agtultuloy dagiti pammapatay a mangipaneknek iti saanen a pannakaraem ti kinasagrado ti biag a sagut ti Dios. Agtultuloy latta dagiti dangadang iti nagbaetan dagiti puersa ti gobierno ken dagiti rebelde a komunista uray iti tiempo ti Paskua. Adda latta latta ti pangta ti terorismo ken riribuk sadiay Mindanao.

Nagkas-ang dagiti dakes a pasamak iti pagilian nga ayan dagiti minilion a Kristiano ta uray iti tiempo ti Paskua ket saan a maibiag dagiti umili ti espiritu ti pannakaitao ti Dios ta addan dagiti tattao a pinagbalinda a didiosen ti kinabaknang, dayaw ken turay.             

Iti daytoy a Paskua, riknaen ken ibiag koma dagiti Pilipino ti espiritu ti Paskua babaen ti panagari iti ayat iti pada a tao kas agkakabsat nga anak ti Dios. (Eden Alviar)