Rimmaut a kamkameng ti CNN iti PA detachment, nabigbig, nakasuan

STA. CRUZ, Ilocos Sur – Nabigbigen ken naipilaanen iti kaso dagiti kameng ti lokal a terorista a rimmaut iti 81st IB Philippine Army detachment idi Nobiembre idi napan a tawen a nakasugatan iti tallo a soldado, daytoy ti kaudian a report manipud iti police station ditoy nga ili.

Iti progress report ti police station ditoy a napetsaan iti Enero 31, 2015, nainaganan dagiti kameng ti CNN a kas Rowena Antalan, am-ammo pay a kas Marie, Joy, Sonia, Hanna, ken Danna, residente iti Barangay Calaoaan, Candon City; Ronnie Dalem Garvida, am-ammo pay a Julius Marquez, Ore, Orlie, George, Lexus, Itchor, Exor, ken Nero, residente iti Barangay San Quintin, Pangasinan ken Dumalneg, Ilocos Norte; Crisaldo Bangsil alias Resty Labrador, Gonhad, Mael, Colas, ken Justine, residente iti Barangay Babayoan, Sta. Cruz Ilocos Sur; Raul Bangsil, am-ammo pay a kas Jack, Ponce, Avelyn, Bonuan, Joy, Bel, ken Justine, residente iti Barangay Ili Sur, San Juan, La Union ken Poblacion, Bacnotan, La Union; Francisco “Jun” Bonuan alias Cesar, Joel, Rolly, residente iti Brgy. Ili Sur, San Juan, La Union ken Barangay Poblacion, Bacnotan, La Union; Alpha Sunggay, ammo pay iti sabali a nagan kas Jessie, Jack, Mael, ken Mil ken residente iti Barangay Casantaan, Sto. Tomas, La Union; Johnny Obena, am-ammo pay kas Rod ken residente iti Barangay Casantaan, Sto. Tomas, La Union; Evaristo Bouquing Jr. am-ammo pay iti nagan nga Andi Bouquing, Gardo, Moi, Molen, ken Rannie ken residente iti Barangay Baluarte, Salcedo, Ilocos Sur; ken Avelino Cruz y Alcaraz , am-ammo pay iti nagan a Jonel ken residente Lubong, Sta. Lucia, Ilocos Sur.

Naiyendorson ti kaso a multiple frustrated murder iti opisina ti provincial prosecutor, Vigan City para iti preliminary investigation maikontra kadagiti nadakamat a suspek babaen iti docket I-03-INV15A-00056 a napetsaan January 30, 2015.

Maipalagip a tallo a soldado ti gobierno ti nasugatan bayat ti pannakirangetda a mangsalaknib iti kampoda kadagiti rimmaut a mapapati a kameng ti New People’s Army idi agarup 8:30 ti rabii ti Nobiembre 10.

Nabigbig dagiti nasugatan a soldado a da Pvt Rey Bajar y Trinidad, Pvt Sam Garote y Baybaya, ken Pvt Jaceth Baluyan y Catalog.

Segun ken ni Captain Dexter P. Apsay ti 81st IB, idi agarup 8:15 ti rabii ti nadakamat a petsa, addada iti detachment idi mapapati a rimmaut dagiti kameng ti CNN.

Kinuna ni Apsay a nagpaut ti ranget iti sumurok kumurang 30 minutos ngem napaay dagiti rimmaut a nangrubbuot iti kampo ket naglibasda idi agarup 8:45 iti dayta met laeng a rabii.

Segun met iti Sta. Cruz police station, nakaawatda iti mensahe manipud iti maysa a PFC Rolando M. Vallejo ti 81st IB a nakabase iti Barangay Bugbuga ditoy met laeng nga ili, a rinaut ida dagiti mapapati a kameng ti CNN.
Dagus nga immarayat ti Ilocos Sur Police Provincial Office nga indaluan ni Police Senior Supt. Nestor Eswagen Felix, kaduana da Supt. Maximo Almachar Taclas, Chief, PIDMB, Sta. Cruz police station nga indauluan ni COP Chief Inspector Simon G. Damolkis, ken PCLO, Candon Sub Office ket nangisayangkatda iti SOCO iti nakapasamakan ti ranget a nakarekobreanda iti maysa a bala ti M203; maysa a bala ti M14; 21 kapsula manipud iti M16; 19 kapsula manipud iti M14; ken 3 a kapsula manipud iti M203.#