Rinibribu a tattao, nagdudupudop iti Vigan City, nagbuya iti Longganisa Streetdancing Competition

VIGAN CITY – Rinibu dagiti sangsangaili ken turista a nagdudupudop kadagiti kangrunaan a kalsada ditoy siudad a madalanan ti Longganisa Streetdancing manipud iti sanguanan ti city hall, agpaabagatan iti Quezon Avenue, nagpadaya manipud iti Simbaan a Bassit, sa nagpaamianan iti Mena Crisologo a pakasarakan kadagiti antigo a balay a napatakder pay idi tiempo dagiti Kastila.

Kaadduanna kadagiti tattao ti saanen a naggawid ket nangandan iti siudad tapno adda matugawanda a nasayaat a puesto ta kalpasan ti parada, naituloyen ti Longganisa Streetdancing showdown iti Plaza Burgos ket ditoy nga impabuya dagiti partisipante ti siglat ken lung-ayda bayat ti panangkumpasda iti nakaranting a tokar a nairanta a para iti dayta a kompetision.

Pinatalgedan ti kalkalpas a parambak a maysan ti Longganisa Festival kadagiti kangrunaan a pagteng a daydaywen dagiti tattao manipud iti nadumaduma a lugar ditoy pagilian ken uray kadagiti kailian iti ballasiw-taaw a nangigagara iti panagbakasionda tapno umayda makipagrambak iti daytoy a festival a maang-angay kas panangselebrar iti anibersario ti panagbalin ti Vigan a maysa a siudad idi Enero 22, 2001.

Kas kadagiti estudiante iti University of the East, nakatingtinggaw dagiti garakgakda iti pannakipagragsakda bayat ti panagsasala dagiti partisipante iti streetdancing competition iti Heritage Village.

Napaliiw pay ti bunggoy dagiti pamilia manipud iti lolo agingga iti appo nga immay nakipagrambak iti Vigan iti daytoy nga aldaw, pammaneknek nga inrantada iti ibibisitada ditoy siudad iti panangrambakna iti Piesta ti Konbersion ni San Pablo a kariping metten iti pannakaitampok ti Longganisa Festival.

Kas kinuna ni Mayor Eva Marie S. Medina, dakkel ti naitulong ti Longganisa Festival iti Vigan, nangruna iti pannakaipromot, saan laeng ti maipagpannakkel a produkto ditoy a longganisa, no di pay iti pannakaitag-ay ti siudad a kas maysa kadagiti kangrunaan a destinasion iti Amianan a Luzon.

“Estratehia met ti Longganisa Festival ti pannakaipromot ti turismo, nangruna dagiti nasayaat ti pannakapreserbada nga Spanish ancestral houses iti Heritage Village iti Mena Crisologo Street, dagiti naimas a produktotayo a taraon, dagiti napintas nga inabel ti ima nga aruaten, ti Vigan River Cruise, ken dadduma pay,” kinuna ni Mayor Medina.

Iti daytoy a tawen, rinugian dagiti agtuturay ti Vigan ti tinawen a parambak babaen ti siam-nga-aldaw a nobena ken ni San Pablo, a nangrugi idi Enero 16 ken nagtunged idi bisperas ti Piesta ti Konbersion daytoy patron ti Siudad ti Vigan.

Sakbayna, di pay naggibus ti tawen 2012, ngem lininayen dagiti agtuturay ditoy dagiti nadumaduma nga aktibidad nga insaganada tapno naballigi ti pannakaangay ti parambak ken ad-adunto manen dagiti maawis a turista nga umay agpasiar iti siudad;

Karaman dagiti aktibidad iti daytoy a parambak dagiti sumaganad: Enero 17 – DZNS Night; Enero 18 – Education Day/Night a nakaangayan ti oratorical and extemporaneous speech contest, quiz bowl and teachers and students got talent; Enero 19 – SK day and night a nakaipabuyaan ti  Sayawitang Kabataan; Enero 20 – gay pride day a nangisayangkatanda it, alay gupit, koronasion ti Miss Gay Vigan City 2013; Enero 21 – social services and NGO day a nakakoronaan ti Vigan Infantile King and Queen;  Enero 22 -Vigan City day a nakaitam-pokan ti longganisa cookfest showdown, longganisa street dancing ken longganisa showdown; Enero 23 – GMA Kapuso Fiesta ken Philippine acrobatic troupe; Enero 24 – Metro Vigan dancesports club night, balik- Vigan night ken isasangpet ti Ronda Pilipinas 2013; Enero 25 – city fiesta a nakaangayan ti grand parade; Enero 26 – agriculture day nga adda float parade; Enero 27 – AVQ production night.

Ita a tawen, iti Category A a nagsasalipan dagiti nadumaduma a pagadalan iti siudad, nagkampeon iti Longganisa Festival ti Vigan National High School East; maikadua ti Ilocos Sur National High School; ken maikatlo ti San Nicolas National High School.

Iti Category B wenno Open Category, nangabak ti Marcos National High School;  maikadua ti University of Northern Philippines; ken maikatlo ti Tagudin National High School.

Kabayatanna, tagtagiurayen dagiti agtuturay ken dagiti umili ti resulta ti panagbubutos para iti pannakapili ti New 7WonderCities a maysa ti Vigan City kadagiti kangrunaan a mapagpilian.

Nagpatingga ti panagbubutos idi Disiembre ket nagwagayway ti Vigan City ngem iti saan nga ammo a gapu, naitantan ti pannakaideklara dagiti napili.#