Rinibribu a turista, nakisemana iti Baguio City

BAGUIO CITY – Rinibribu dagiti turista a simmang-at ditoy siudad iti pannakapaliiw ti Holy Week, segun iti maysa nga opisial ti turismo ditoy.

Fully booked dagiti nadumaduma nga otel, inns ken boarding houses gapu iti kaadu dagiti bakasionista a nangpalabas iti Semana Santa ditoy siudad, segun iti nasao nga opisial.

Kanaig daytoy, narikpan ti Session Road kadagiti lugan idi Biernes Santo ken Sabado Gloria tapno nawaya ti panagpallailang dagiti turista.

Iti napalabas a dua a tawen, saan a nakurkurang ngem 700,000 a tattao ti simmang-at ditoy siudad a mangpalabas iti Semana Santa.

Paborito dagiti turista ti Baguio City a pagbakasionan agsipud iti nalamiis a klimana ken adu ti pagpasiaranda a beauty spots a pakairamanan ti  Burnham Park, Camp John Hay, The Mansion, Wright Park, Mines View Park, Baguio Botannical Garden, Lourdes Grotto, Philippine Military Academy, ti Station of the Cross iti Sto. Tomas, Mt. Pulag iti Kabayan, Benguet ken dadduma pay.#