Rinibribu a turista, manamnama a makipagselebrar iti Raniag Twilight Festival

VIGAN CITY – Manamnama nga agdadarison ditoy siudad dagiti rinibribu a turista ken sangsangaili tapno makipagselebrarda iti Maikapat a Raniag Twilight Festival a naluktan itay Oktubre 25 ken agpatingga inton Oktubre 31.

Itay Oktubre 25, naangay ti candle floating ceremony a nakagangtan dagiti kandela a naikabil iti box ket naipayanudda iti Karayan Mestizo.

Kinuna ni Mayor Eva Marie Singson-Medina a napnuan kaipapanan ti panglukat nga aktibidad agsipud ta malaksid a ipamatmatna ti pannakadalus ti komunidad manipud iti dakes a gasat ken negatibo a vibrations, nagpaay pay daytoy a maysa a wagas a panagyaman iti Namarsua gapu kadagiti adu a parabur manipud iti karayan ken baybay.

Idi Oktubre 26, naipatayab dagiti lantern iti kalpasan a nagdalapdap ti sipnget iti Jardin de Caridad.

Namnamaen dagiti agtuturay ditoy nga idadauluan ni Medina a naburburnok manen ngem idi napan a tawen dagiti turista ken sangsangaili a makipagrambak iti Vigan City ta narungrungbo dagiti maidasar nga aktibidad ken pabuya ita tawen.

Marugian iti alas sais ti malem ti Oktubre 27, magangtan ti Christimas Tree iti Vigan Public Market, ken malukaisan ti abbong ti nabayag a sinegseggaan dagiti umili a mabuya a Christmas display iti sanguanan ti Vigan City Hall.

Sumaruno a tampok a pabuya ti Raniag Streetdancing Parade ken Float parade a maaramid iti alas siete sa ti Kapuso Night a panagpabuya dagiti nalatak nga artista ti GMA Television Network a pakaibilangan da Thea Tolentino, Jeric Gonzales, Elle Ramirez, Zandra Summer, Angelu de Leon ken dadduma pay a Kapuso stars a kas kada Mike Tan, Jackie Rice, Kevin Santos, ken dagiti komediante Pekto and Boobay.

Iti alas nuebe ti rabii, maangay ti panglukat a programa ti World Costume Festival ken panaglukat dagiti exhibit iti Vigan Culture and Trade Center.

Kabigatanna, Oktubre 28, maangay iti alas sais ti malem ti World Costume Competition, Luzon ken Vigan Legs iti Crisologo Street, (Bonifacio ken Gen. Luna blocks).

Sumaruno ti Zumba Party iti alas otso ti rabii.

Inton Biernes, Oktubre 31, maangay ti Zombie Outrun Season 2 iti sango ti provincial capitol, kas pakauna a selebrasion ti Piesta dagiti Natay.

Ad-adda a napnuan kaipapanan daytoy a pannakarambak ti Raniag Festival agsipud ta limsot ti Vigan City a maysa kadagiti 14 a finalist iti New7Wonders Cities of the World a naiwaragawag idi Oktubre 7.

Kinuna ni Mayor Medina nga all-out ti kampania ti Vigan para iti maudi a rikos tapno mabutosan a maysa kadagiti 7 a pagsidsiddaawan a siudad iti sangalubongan a maammuanto ti pinal a resultana inton Disiembre 7, 2014. #