Rinibu nga estudiante, maiyemplo babaen ti SPES program

LAOAG CITY -Manamnama a rinibu nga estudiante ti maiyempleo ita a summer vacation iti babaen ti Special Program for Employment of Students (SPES), daytoy ti naammuan manipud iti opisina ti Public Employment Service Office (PESO) itay nabiit.

Kinuna ni Nicole Rudio, hepe ti PESO-Ilocos Norte nga agserbi dagiti maiyempleo nga estudiante a kas tourist aides kabayatan ti summer vacation ken holiday break iti babaen ti SPES program.

Agsueldo dagiti maawat nga estudiante iti P311 kada aldaw ket 60% ti ibaklay ti gobierno ti probinsia idinto a 40% ti bayadan ti Department of Labor and Employment.

Maipalagip a napadawayan ti PESO-Ilocos Norte kas Best Performing PESO in Region 1 for 2014 gapu iti programana a panagiyempleo kadagiti estudiante nangruna iti summer vacation tapno adda matgedanda para iti busbosenda nga agbasa.#