Rinibu nga umili nabenepisiaran iti Ohana, ISAH medical mission

VIGAN CITY – Rinibu nga umili manipud iti siam nga ili ken maysa a siudad ditoy Ilocos Sur ti nabenepisiaran iti medical mission nga insayangkat ti Ohana ken ti Ilocos Surian Association of Hawaii manipud Disiembre 15 agingga iti Disiembre 22.

Kinuna ni Bokal Jeremias Singson, chairman iti committee on health iti sangguniang panlalawigan a a dupudop dagiti agindeg iti probinsia ti napan nagpakunsulta ken nagpaagas iti makalawas ti libre a serbisio ti salun-at nga impaay dagiti dua a nasao a grupo nga agpada a nakabase iti Hawaii babaen ti pannakikammayet ti gobierno probinsial ken dagiti maseknan nga ili ken siudad.

Segun ken ni Singson, insayangkat ti dua a grupo ti medical ken dental mission iti Cabugao idi Disiembre 15; Sto. Domingo, Bantay, ken San Ildefonso (Disiembre 16); Vigan City, Caoayan, ken Sta. Catalina (Disiembre 17); San Juan (Disiembre 18); Santiago (Disiembre 21); ken Santa (Disiembre 22).

Naammuan ti Tawid News nga indauluan ni Dr. Charlie Sonido, tubo ti Cabugao, Ilocos Sur ti grupo ti Ohana a pakabuklan ti nasurok a 20 a doktor, nurses, surgeons, pharmacists ken dadduma pay a volunteers manipud iti Hawaii, California ken Maryland ket libre ti insayangkatda a konsultasion, diabetes, blood, sugar and blood pressure screenings, ken minor surgical operations. Mismo nga inkuyog ti Ohana group ti bukodda nga agas para iti impaayda a medical mission.

Bayanihan ti kayat a sawen ti Ohana.

Nagiwaras pay ti grupo iti gift bags a naglaon iti bagas, sardinas, noodles, medias ken sinelas kadagiti marigrigat ken makasapul unay nga umindeg.

Timmulong met iti mission dagiti doktor, dentista, ophthalmologists ditoy probinsia.

Kinuna ni Singson a malaksid ti panagagasda, nangangay pay ti grupo iti pasalip iti kanta: ti Kid’s Idol a nakipartisiparan dagiti ubbing nga agtawen iti 8 agingga iti 15, ken ti Ilocos Sur Idol para kadagiti agtawen iti nangatngato ngem 15.

Immawat ti kampeon iti P10,000.00 ken sertipiko, P7,500.00 ken sertipiko ti inawat ti nangabak iti maikadua a gunggona ken P5,000.00 ken sertipiko ti inyawid ti nangabak iti maikatlo a gunggona.

Amin dagiti nakisalip ket umawat iti consolation prize ken sertipiko.
Nangangay pay ti grupo iti seminar-workshop para kadagiti medical students, barangay health workers, ken nurses no sadino a nailektiur kadakuada dagiti pakaseknan iti salun-at.#