Footer

Riri dagiti annak, nagtungpal iti pammaltog

BANTAY, Ilocos Sur – Namunganay daytoy pammaltog iti panagriri dagiti annak a nakaigapuan ti komprontasion iti nagbaetan ti dua nga amma a nagtungpal iti pannakapaltog ti maysa.

Kas resultana, napilaan iti kaso a double frustrated homicide with attempted homicide iti provincial prosecutor, Vigan City ni Jonathan Guevara y Rigor, 37, naasawaan, residente iti Barangay Balaleng Laudenia, ditoy nga ili, gapu iti panangpaltogna kada Mocsana Adoma, 45, naasawaan; Akmad Mangorse, 38, naasawaan; ken Akisar Abdul Majeed, 13, Grade Vi pupil, agpapada a residente iti Barangay III, Bantay, Ilocos Sur idi malem ti Pebrero 3 iti sanguanan ti Balaleng Elementary School, ditoy met laeng nga ili.

Sakbay ti pammaltog, mapapati a nagringgor ti anak ni Guevara ken ti anak ni Adoma ket kinompronta ti suspek ti anak ti Muslim.

Mapapati a sinipat ni Guevara ti ubing a puon ti nagsangitan daytoy ket nagpulong iti amana.

Agpada da Guevara ken Adoma a nangitulod iti anakda iti eskuela ket ditoyda a nagengkuentro.

Mapapati a kinumpronta ni Adoma ti suspek sana dinisnog iti naminsan a puon ti nangasutan ni Guevara iti paltogna sana pinaltogan ni Adoma a nakairamanan da Akmad Mangorse ken Akisar Abdul Majeed.

Naglibas ti suspek kalpasan ti pammaltog idinto a naitaray dagiti biktima iti Metro Vigan Cooperative Hospital tapno maagasan dagiti sugatda.

Nakarekobre dagiti nagresponde a polis iti uppat a kapsula a nagtaud iti cal. 45 iti nakapasamakan ti pammaltog.#