Riri iti basura nagtungpal iti pammaltog

VIGAN CITY – Riri iti basura ti puon ti nangpaltogan iti maysa a lalaki iti kaarrubana idiay Barangay VI, ditoy siudad idi bigat ti Pebrero 25.

Pinaltogan ni Fedelito Joven y Benzon, 45, baro, ken residente iti Barangay VI ti kaarrubana a ni Oliver Tuazon y Ciervo, 42, baro, karpintero, ken residente met laeng iti nadakamat a lugar gapu laeng iti panagririda mainaig iti basura a naibuntog iti abaga ti kalsada iti nagbaetan dagiti balayda.

Naggawid ni Joven ket idi nagsubli, addan iggemna a gauge 12 buckshot (paltik) ket pinaltoganna ti biktima a nakapuntaan ti likud daytoy.

Naglibas ti suspek, kuyogna ti paltog, iti saan nga ammo a direksion a nakalugan iti chop-chop Dio scooter.

Nupay kasta, boluntario a simmuko ti suspek idi agarup alas 8:10 iti sardam ti Pebrero 25 iti Vigan City police station babaen ti panangkuyog kenkuana ni Barangay Captain John Patrick Singson ket naipan iti City Health Office para iti medico-legal examination.

Iti pannakaisurat daytoy, nakabalud ti suspek, pagur-urayanna ti pannakaipila ti kaso maikontra kenkuana.#